أكل وشرب
شرين منصور٢٦ أكتوبر ٢٠٢٠
This article is also available in   Switch Language

٥ محلات كشري في وسط البلد لازم تجربها

الكشري مش مجرد مكرونة ورز وعدس.. لكنه اختراع مصري بيجي على راس الأكلات الشعبية والسياحية كمان، ومنطقة وسط البلد فيها مجموعة من محلات الكشري المميزة واللي دايما زحمة.


١. سيد حنفي



من علامات وسط البلد وأكيلة الكشري يعرفوه كويس.. سيد حنفي بدأ في 1952 على عربية كشري صغيرة، وربنا فتحها عليها وعمل المحل. وهو مشهور بالنص ليمونة اللي بتجيلك مع طبق الكشري فلما تعصرها مع الدقة والشطة تولع نار!

والأسعار عنده من 8 لغاية 22 جنيه وطاجن اللحمة بـ16 والفراخ بـ18.



٢. أبو طارق



بدون مبالغة أبو طارق هو أشهر محل كشري في مصر، وكتبت عنه جرايد مصرية وأجنبية كتير، هتلاقي صورها في المحل، وهو برضو أول براند كشري مصري يفتح فروع في السعودية ودبي.


الأسعار عنده تبدأ من 13 لغاية 25 جنيه، وعنده رز بلبن وعاشورا ومهلبية.



٣. التحرير



كشري التحرير في وسط البلد من المحلات اللي دايما السياح بتاكل فيها، وزمان كان معلق يافطة تحذير إن الشطة حامية، لما كانت موضة جديدة في محلات الكشري إنهم يعملوا الشطة بالزيت على النار فبتكون حامية جدا.


والأسعار فيه بتبدأ من 7 لغاية 25 للطبق الفردي وفيه أطباق عائلية بتكفي 5 أفراد.



٤. توم آند بصل



على وزن توم آند جيري اختار توم آند بصل الاسم بتاعه، وده ساعدهم على الانتشار في فترة قصيرة، لأنه من المطاعم الجديدة نسبيا. وكمان قرروا إن يوسعوا نشاطهم علشان يكسبوا نوعيات أكتر من الزباين فاشتغلوا في البيتزا والفطاير.


الأسعار عنده تبدأ من 11 لغاية 24 جنيه.



٥. المؤمن وجحا



كشري المؤمن وجحا من الأماكن اللي واخدة حقها في الشهرة في وسط البلد، وهو بيوفر قعدة لطيفة جدا سواء في الصالة المتشطبة بشكل فخم أو الترابيزات اللي في الشارع وحواليها زرع بيخلي القعدة مبهجة.


عندهم كشري وطواجن وممكن تطلب سلطة ومخلل وعيش مقلي (توست) وطماطم متبلة.

مقالات ذات صلة