حاجات بتسمعها في اي افطار عائلي بمصر

في كل جمعة عائلية على الافطار، بتسمع الحاجات دي.

١. الأكلة مش أكلتك

بعد ما يحطوا نص طن أكل في طبقك و متبقاش قادر تاكل حاجه.

٢. نورتوا يا جماعه

الجملة الي بتتقال مليون مرة لما الناس كلها تسكت و ميبقاش في حاجة تانية تتقال.

٣. مادام مخلصتش طبقك يبقي اكلي معجبكش

و دي غالبا بتبقي جدتك ال مليتلك طبقك عشر مرات و كل اما تيجي تاخد نفسك تخبطك الجملة دي.

٤. نسيت أسخن عيش ممكن تروح تجيبه

اي سفرة عائلية لازم كل مرة حد ينسي يسخن العيش.

٥. سفرة هنيه/دايمة يا جماعه

دايما بتلاقي اي حد يخلص اكله و قايم يقول الجملة الشهيرة دي.

٦. روح هات مايه

زي العيش بالظبط المايه من الحاجات الي بتتنسي و محدش بيفتكر يطلبها منك الا و انت في نص الاكل او لسه حاطط ايدك فيه حالا.

٧. حد يعملنا شاي/قهوة بقي

الجملة الي اول ما بنسمعها بعد الاكل كلنا بنقوم نستخبي.