مشاريع
كارلوس أنيس٠١ أبريل ٢٠١٩
This article is also available in   Switch Language

١٠ أماكن لازم تروحهم في الزمالك

معروف عن الزمالك أنها واحدة من أجمل وأرقى الأحياء في مصر، وأنها مكان مناسب لقعدة حلوة أو حتى فسحة للمزاج الرايق اللي بيحب يبعد عن الدوشة، مكان هيخطفك وهو متحاوط من كل ناحية بالنيل وشطه ونهاره وليله، في الزمالك مكان كويس لفسحة حلوة وذكرى هتعيش، واحنا علينا الأماكن اللي هنرشحلك تزورها انت وصحبتك.


١. قصر عائشة فهمي



تم افتتاحه للزيارة بعد ما خلصوا أعمال ترميمه، انت هتزور تحفه فنية من عصر الملوك، هتحس أنك ركبت آلة الزمن ورجعت 100 سنة لورا، مكان مليان بالتاريخ والحب والشجن وفن، قلبك هيتاخد من وانت على الباب، ولو تعبت من اللف جوه القصر، في قعدة حلوة بتطل على النيل على طول، المكان ده محتاجله يوم لوحده عشان تديله حقه كويس.



٢. روف توب الزمالك


ورا قصر عيشة فهمي هتلاقي روف توب الزمالك، ده تروحه وقت الغروب، تحضر الغروب على شط النيل، مكان رومانسي وهادي والمعاملة هناك جميلة وهتبسطك، ولما الليل يحكم، انت على موعد مع سهرة لا تنسى على النيل، نقول تاني “مكان رومانسي”، بس حلو كمان للصحبة الرايقة اللي تحب اللمة الحلوة.


٣. Tavolino



قعدة المزاج، المزيكا الحلوة، والفرفشة أو النكد، على حسب المود طالب معاك أيه، المهم أنك هتحس أن انت دخلت ليلة مختلفة عن أى بار رحته قبل كده، والكوكتيالات هناك بتتعمل بشكل محترف ومزاج عالى، هو كمان مطعم بيقدم أكل لذيذ وخدمة متميزة، يمكن أن تذهب إليه وحيدًا أو برفقة الحبايب، المهم أنك لازم تجربه.


٤. مركز الجزيرة للفنون



لو بتحب الرسم والفن التشكيلي، يبقى لازم تزور مركز الجزيرة للفنون، هتلاقى هناك لوحات قمة الروعة والخيال، وفعليات وندوات ثقافية هتخليك تحب الفن والمكان أكتر وأكتر، ولو حابب تجرب حاجة مختلفة وخروجة هتفرق معاك، يبقى ده المكان المناسب، بس متروحش لوحدك.



٥. ساقية الصاوى



مين راح الزمالك ومرحش ساقية الصاوى، مين مجربش يحضر فيها حافلة ولا قاعدة حلوة على النيل، وخد بالك الساقية مكان لا يسمح بالتدخين فيه إطلاقًا، انت داخل صرح للفن والمزيكا والجمال، لو مرحتهوش قبل كده، متأجلش أكتر، شوف أقرب حفلة أو ندوة من على الصفحة الرسمية وروحها، الساقية مكان مش هتعرف تبطل مترحهوش.



٦. جوول كافيه

تروحه الصبح أو بليل، هو مكان حلو في أى وقت وفي كل وقت، المشروبات والأكل هناك ممتاز والخدمة حلوة ولذيذة، لو عندك ماتش للفرقة اللي بتحبها، خد صحابك وروح اتفرجوا عليه في جوول، ولو عايز قعدة وخروجة حلوة برضه روح جوول.


٧. Club 33



معروف أن شارع أبو الفدا في الزمالك مليان كافيهات، بس من علامات شارع أبو الفدا club 33 بقعدته الحلوة على النيل، والشيشة المظبوطة، والأكل الحلو، كمان الخدمة هناك لطيفة وتيم المكان من أجمل ما يكون، مكان مثالي لتقضية وقت لطيف، روحه بليل كده عشان القعدة على النيل بتحلو بليل.



٨. بوخريست

وانت بتتمشى في الزمالك لازم تشوف أسمه، لكن من بره حاجة تشدك ومن جوه حاجة هتتدمنها، بعد كده هتفكر ألف مرة وانت في الزمالك أنك تقعد في مكان غيره، الأكل هناك لذيذ جدًا، والباستا لعشاق المكرونة هناك في منتهى الطعامة والحلاوة، بس خد بالك عشان بيبقى زحمة أغلبية الوقت بالذات بليل.



٩. Pottery Café



مينفعش تكون بتروح الزمالك من غير ما تجرب Pottery Cafe، الشيشة هناك حوار كده لوحده، والحلويات بالذات الكب كيك هتاكل صوابعك وراها، أما القعدة نفسها في المكان مريحة وبتوفرلك خصوصية وروقان هيبسطوك، معظم اللي راحوا المكان ده بيشكروا فيه، والمكان ده بيربي زبون، يعني ممكن تلاقى نفسك مبتروحش غيره في الزمالك بعد كده بس الخدمة المتميزة هناك.


١٠. مطعم مهراجا الزمالك

سلسلة مطاعم مهراجا تعتبر من أشهر المطاعم اللي بتقدم أكل هندي في مصر، مش بس كده انت مينفعش تروح مهراجا من غير ما تكون جربت تلبس اللبس الهندي وانت بتاكل الأكل الهندي وتاخد كام صورة للذكرى الحلوة، “الشيء لزوم الشيء” زى ما بيقولوا في الأمثل، مهراجا الزمالك هتلاقيه وراه فندق فلامنكوا العنوان ميتوهش، خد صحابك وحبايبك وجرب رحلة للهند وأكلها مش هتنساها وهتحب تكررها.

مقالات ذات صلة