ليستات
كارلوس أنيس٢٠ ديسمبر ٢٠٢١
This article is also available in   Switch Language

5 صفات للزوج المصري الأصيل

لما نتكلم عن الزوج المصري، يبقى تقوم تقف وانت بتكلمني، نزاهة أيه، لباقة أيه، لياقة أيه.. أيه الكرش ده أيييه يعم..

في السطور الجاية هنقولك على 5 صفات للزوج المصري الأصيل، لازم هتلاقيها في أى راجل مصري على قديمه.

1. الحنية

الزوج المصري معروف بحنيته ورومانسيته، صوته أول ما بيصحى من النوم والفانلة الحملات بتبرز السكس باكس المتدلى أمامه وهو يطلب بكل أدب وزوق وصوت واطي خالص، فين الفطار يا ولية، هتأخر على الشغل الله يخربيتوكوااا.

2. الثقة بالنفس

يمتاز الزوج المصري بثقته في نفسه، فهو أجمل راجل جه وهيجي على وجه الأرض، ومن حسن حظك انتي وأمك أن هو جوزك، ومعندهوش شك واحد فالمية أن مفيش ست مبتحبهوش.

3. مبيتفهمش

بداية الفتى كانت من راجل متجوز اتسأل نعمل أيه مع الزوجة النكدية، ولأنه ميعرفش فقام يفتي، وبعد كده الموضوع كبر وصدق فتوته وأنها صح، ومن هنا بدأ يشوف نفسه أكثر الرجال علمًا وفهمًا وأن الست مراته ديه مبتفهمش حاجة، هو فاهم كل حاجة من أول أبعاد الأزمة الاقتصادية بين أمريكا والصين لحد ليه طبيخ أمه أحلى من طبيخك.

4 إهمال المظهر بعد الجواز

الراجل المصري مبيتهمش بمنظره بعد الجواز، يمكن أبرزها أن معظم الرجالة في مصر بكرش، لكن المشكلة أنه عنده قناعة أن مفيش مشكلة لما يبقى بكرش لأنه راجل والمظهر مش مهم، وبيتعامل بإزدواجية مع زوجته وإهمالها لمظهرها بعد الجواز، كأنه هو بس اللي عنده ضغوط ومسؤوليات وهى لأ.

5. العصبية

من أكتر الحاجات السيئة في الزوج المصري أنه عصبي، في مبررات كتير أنه يبقى مضغوط منها الشغل والمشاكل المالية، بس أنه يطلعه على مراته وعياله ده شيء يفتقر للحكمة.

مقالات ذات صلة