أسوء ٥ شخصيات هتقبلهم في الجيم في مصر

كتير من المواقف والشخصيات اللي هتتعرضلها وتقابلهم لما تقرر تروح تظبط الفورمة بتاعتك في الجيم، بس احنا هنكلمك عن أسوء 5 شخصيات ممكن تقابلها وسط مجتمع الجيم عشان تاخد بالك منهم وتركز في تمرينك…

١. بتلعب غلط

هذا النوعية مش بتكبر لحد لا مدير صالة ولا مدرب، هو بقاله شهرين في الجيم وده إداله الخبرة الكافية أنه يدى نصايح للوافدين الجدد في المكان، هدفه يقولك أنك بتلعب غلط مش عشان تلعب صح، لكن عشان تعرف أنه شبح ومفيش زيه… متسمعش كلامه بص لجسمه وانت هتخاف تلعب الصح بتاعه.

٢. سرينة المطافي

بتلعب في أمان الله ومركز في تمرينك، بس حصل يعني وحزقت في رفع أخر عدة عشان تحرق العضلة، وشك مشدود وكل حتة في جسمك بتصرخ عشان تخلص التمرينة، وتلاقي صوت عالي مزعج جاء من العدم “عااااااش يا كوووتش”، مهو يا انت هتتخض يا هتضحك، وفي كل الحالتين تعبك راح، ركز في لعبك.

٣. اللي جى ينام

ده بيتعامل مع أجهزة الجيم، نفس تعامله مع سريره، فهو أكتر مكان مناسب بنسباله ياخد فيه قيلولة لحد أما يستعيد قوته، ده مش بيخلص تمرينته في ساعة، ده بيخلص لما الجيم يقرر يقفل، مسافة ما يكون نامله بتاع سعتين تلاتة على كل جهاز بيلعب عليه، وربنا يعين الناس اللي بتلعب معاه في نفس اليوم.

٤. ومن شر حاسد

مبيعملش حاجة غير أنه يحسد أى بني أدم بيشيل أوزان أكتر منه، وتلاقيه واقف كده من بعيد بيبص على اللي بيلعبوا لدرجة أنك مش بتلاقيه بيلعب تمرنتين على بعض، استخبي منه وانت بتلعب، وربنا يكفيك شر إصابات الملاعب.

٥. يا أناني

ده شخص مفتول العضالات وحرص منه، هتلاقي كل الأوزان عنده، وروحك برضه عنده لو فكرت تقوله عايز الوزن ده ألعب بيه، يا تستني يخلص لعب بالأوزان عشان تكسب عمرك ويومك، يا ربنا يتولاك بقى وتروح تلعب ضغط.