ليستات
مها محمد٢٣ نوفمبر ٢٠٢٠
This article is also available in   Switch Language

7 أنواع من المديرين ممكن تقابلهم في الشغل

كل شغل هتروحه هتلاقي مدير بطبع وشكل تاني خالص عن اللي قبله، وكل لما تشتغل أكتر لازم هتشوف أكتر.

والنهارده جبنلكم 7 أنواع من المديرين اللي ممكن تتعامل معاهم وتشوفهم علي مدار حياتك المهنية:

1. المدير الفراشة:

وده المدير اللي مبيقعدش في مكانه خالص، وبيفضل طول الوقت بيلف علي المكاتب أو علي العملاء.

يعني مش سايب حد في حاله، مُريب وشكاك في نفسه كده.

ده بقي خلي بالك منه عشان ممكن يطلعلك من شاشة الكمبيوتر نفسها يشوفك بتعمل ايه!

2. المدير علي به مظهر:

المدير ده بقي ملوش علاقة بالفيلم، الفكرة كلها أنه يحب يهتم بالمظاهر والشكل الخارجي للناس والموظفين اللي عنده.

يحب كل حاجة في مكانهم ومنظمة وكل حاجة بمواعيد ونظام.

ده أنت ممكن كمان تلاقيه علي مكتبه ورد ومعطر عشان المكتب يفضل فريش.

3. المدير المستعجل:

المدير ده بقي حالته صعبة وتحسه أنه مركب vibration طول الوقت، ومش علي بعضه.

عايز كل حاجة تخلص في ساعتها، عنده كل حاجة في الشغل urgent ومفيش أولويات.

يعني يبعتلك mail من هنا ويجي في نفس ذات اللحظة يقولك ” أنت مشوفتش الميل ولا ايه، أنا عايزه يخلص النهارده”، مع

العلم أنه ممكن يقول كده قبل ما تمشي من الشغل بنص ساعة، يعني في الوقت اللي أنت خلاص بتعد الدقايق عشان تمشي.

4. المدير التنك:

ايوه هو اللي جه في دماغك ده، اللي كل حاجة مش عجباه، وطول الوقت بيمجد في شغله وينسب الشغل والمجهود كله لنفسه

ويقول ” ده وأنا في سنكم كنت SEO الشركة، أنتوا خايبين ومبتعرفوش تشتغلوا” مع العلم انه بنسبة 90% بيكدب، بس هو

بيحب يرمي قنبلة كده ويقوم سايبك وماشي، طب أنت كموظف أستفدت أيه غير حرقة الدم!!

5. المدير السقا:

ده اللي طول الوقت عايزك تنط وتتشقلب عشان تخلص الdeal حتي لو العميل بخيل وجلدة، ويا سلام بقي لو النطة

مجتش علي مزاجه ممكن يخصملك عادي. هتلاقيه طول الوقت بيطلب حاجات خيالية وتعجيزية، عشان تفضل طول الوقت

تحت رحمته!!

6. المدير الصاحب:

ده بقي شخص كيوت جدًا ونادرًا كده لما تلاقيه في الزمن ده، يعني حاجة كده زي الأحجار النادرة اللي صعب تلاقيها

بسهولة. ده أنت ممكن تروح تحكيله تاريخك المأساوي وتعيط في حضنه عادي، وهتطلع من الليلة دي ب أجازة يومين كمان،

يلا أبسط يا عم.

7. المدير المثالي:

ده بقي شايلينه للأخر عشان ده الزُبد كله، ده المدير الطيب الحنين، اللي ممكن يزعقلك وكمان 3 دقايق يقولك خلاص يا حسام

أنا وفقتلك علي الأجازة.

ده المدير اللي تلاقيه عازم الشركة كلها علي يومين في الجونة علي حسابه، بس الشغل عنده شغل، زي ما هيديك زي ما

هيأخد. وأهم حاجة أوعي تزعله، عشان غالبًا زعله وحش!

يلا قولنا أنت مديريك أنهي واحد في دول، ولو أتعاملت مع نوع جديد، أحكيلنا عنه وشاركنا برأيك في التعليقات.

مقالات ذات صلة