ليستات
مها محمد٢٤ سبتمبر ٢٠٢٠
This article is also available in   Switch Language

٥ حاجات مش هتلاقيها غير في شوارع مصر

في حاجت كده في البلد من كتر ما أتعودت أنك تشوفها طول الوقت.. بتفتكر أنها شئ عادي. مع أنك لو سافرت بره هتشوف حاجات تانية خالص، وكأنك جاي من عالم تاني كده.

هقولك النهارده علي ٥ حاجات مش هتلاقيها غير في شوارع مصر بس.

١. الركنة صف تاني:

حتي لو هتركن صف تاني يا سيدي لحاجة مؤقتة أو عشان تشتري حاجة من مكان قريب بسرعة، علي الأقل راعي أن في ناس تانية. هتعدي من نفس الشارع وأد ايه ممكن تعطلهم وتعطل مصالحهم بسبب وقفتك دي!!

٢. الطوب اللي بيحط قدام المحلات:

من أكتر الحاجات اللي مش بكون فاهمة سببها ايه، لما تحط طوبة قدام المحال بتاعك عشان محدش يركن..وكأن المكان أو المحل بتاعك هيتشاف أحسن لو سبت الطوب دي!!! حاجة غريبة فعلا!

٣. سايس العربيات

الشخص اللذوذ اللي بيحب يشوف أي مصلحة ويرشق فيها!! من أشهر الجمل اللي هتسمعها كتير منه:

” كل سنة وأنت طيب يا باشا أو يا أستاذة، علي حسب ” – بمناسبة ومن غير مناسبة. ويبقي يومك مش معدي لو مدتلوش حاجة وانت ماشي، ومش هتخلص من الشتايم “ف سره طبعا”. لكن لو أديته، يحرصلك العربية زي ما سبتها وأكتر ويفضل يدعيلك بكل دعوات الدنيا والأخرة!

٤. الأقوال والحكم الموجودة علي ظهر العربيات

تعرف أن وجود أي كلام علي العربيات في أي بلد بره عليه مخالفة! تعرف ليه! لأنها ممكن تشتت أي شخص بيسوق وممكن كمان يعمل حادثة بسبب أنه ألتفت للكلام اللي أنت حاطه علي العربية. هتلاقي من ده كتير في مصر علي كل أنواع العربيات من التكاتك لحد ال BM

٥. عربية الفول

دي بقي عربية مسالمة متقلقش منها صغيرة.. هتلاقيها منتشرة أوي خصوصا وقت الصبح لحد قبل العصر بشويه وهتلاقي عليها زحمة لو الراجل بيعمل فول حلو كمان..نقدر نقول أن عربية الفول دي بنسبة كبيرة بتشكل جزء من فطار الشعب المصري واللي لو لفيت بلد كتير..حتي البلاد العربية مش هتلاقي فيها العربيات دي!

مقالات ذات صلة