ليستات
كارلوس أنيس١٩ سبتمبر ٢٠٢٠
This article is also available in   Switch Language

٥ مسلسلات كرتون من طفولة كل مصري

اتربى جيل التمنينات والتسعينات على مسلسلات كرتون كانت بتتذاع على كل القنوات الأرضية المصرية قبل ما يغزو القمر الصناعي البيوت وتطلع مسلسلات كرتون تانية تزاحم الأولى، لكن برغم مرور السنين هيفضل الكام كرتون جزء من طفولة الشباب المصرى دلوقتي.



١. بكار



أشهر مسلسل كرتون مصرى، اتجمعت عليه كل البيوت المصرية بعد المغرب في رمضان، واللي بيحكي مغامرات طفل نوبي اسمه بكار والمعزة بتاعته رشيدة، وخلال المغامرات هتلاقي دروس كل طفل مصرى كان بيستفاد منها، وطبعًا مش هيجي اسم بكار من غير ما يجي في بالك شارة البداية اللي كنت بتسمعها حتى وانت ماشي في الشارع المغربية في رمضان والفنان ومحمد منير بيقول ” بكااار”.


٢. المغامرون الخمسة



المسلسل ابتدى يتعرض مع بداية الألفية الجديدة، وكان بيحكي قصة المغامرون الخمسة اللي بيسعدوا الدكتور علام في حماية اختراعه “ساعة إيقاف الزمن”، وفي كل حلقة بتعرض المغامرات اللي بتحصل لأبطال المسلسل وهما بيواجهوا دكتور فاى الشرير اللي بيحاول يسرق الساعة ويستخدمها في أعمال شريرة، وإزاى الأبطال بتنجح في الأخر والخير بينتصر، طبعًا أول ما تقرى الاسم هيجي في بالك أغنية الكرتون ” نوسه لوزة تختخ عاطف محب تابع ومخمخ غامر وحب”.



٣. بوجي وطمطم



مفيش طفل في مصر متفرجش على بوجي وطمطم، الكبار والصغيرين تابعوا باهتمام برنامج العرايس المصرى اللي طلع في التمنينات وكان بيتكلم عن السلوكيات اللي المفروض الأطفال يدركوها، وحقق نجاح كبير جدًا ووصل أجزاءه لـ١٨ جزء، وبقى جزء من ذاكرة وهاوية أى شب مصرى دلوقتي، بمجرد ما يسمع اسم بوجي وطمطم بيجي قدامه صورة العرايس اللي كانت بتونسه يومه وهو صغير.



٤. عالم سمسم



من بدايته عام ١٩٩٧ واللى اتعمل بدعم مالي من الوكالة الأمريكية للتنمية الدولية، حقق عالم سمسم نجاح كبير ونال احترام وإعجاب الكبار والصغيريين، ومفيش طفل مصري متفرجش عليه، وميعرفش أسماء ابطاله ومكنش بيستنى كل حلقة عشان يشوف خوخة وفلفل ونمنم هيعملوا ايه، وطبعًا أغنية عالم سمسم اللي مش هتعرف تنساها مهما عدت السنين “عالم سمسم عالم سمسم… عالم سمسم كحك بسمسم.. دنيا كبيرة كبيرة قد الدنيا”.



٥. قصص الأنبياء



اتعمل في أواخر التسعينات وحاز على إعجاب الكبار والصغار، وتناول قصص الأنبياء بشكل مبسط عن طريق شخصيات مصنوعة من الصلصال بتحكي قصة نبي في كل حلقة بشكل يجذب الصغار ويقرب الحكاوى لفهمهم بشكل مشوق، ومفيش بيت في مصر مكنش حريص أنه يتفرج مع عياله على قصص الأنبياء، الكرتون اللي ساب علامة وذكريات جميلة في كل بيت مصرى.

مقالات ذات صلة