شخصيات هتقابلهم في الشغل

وإنت في الشغل، في شخصيات مهما كان مجالك وطبيعة الشغل لازم تقابلهم، وعشان تعرف تتعايش معاهم لازم تعرفهم الأول.

احنا في This Is Cairo هنقوللكم إيه أشهر أنواع الزمايل اللي هتقابلوهم في الشغل:

1. اللي ملوش غير في الشغل:

ده أكتر نوع مريح هتقابله في الشغل، هو جي يشتغل ويمشي، مش مهتم يعرف حد ولا يكون أي صداقات، كل اللي عايزه إن اليوم يخلص ويقفل التارجت.

2. الرغاي:

في نوع كدة مبيعرفش يشتغل غير وهو بيتكلم، في أي وكل حاجة، ده عشان تشتغل معاه لازم يكون عندك Blocking headphones ، وغالبًا مش هتعرف توقفه.

3. الفضولي:

وده بيحب يعرف كل وأي حاجة بتحصل في المكتب، الشركة والعالم، تخصه أو متخصوش، فهتلاقيه عايز يعرف كنتوا بتتكلموا في إيه في البريك، ومحمد اللي في الدور الأول طلب إيه في أوردر الفطار.

4. العصفورة:

أكتر شخص لازم تاخد حذرك منه في الشغل، عشان هو مش رغاي في المطلق لكنه دايمًا “بيوصل رسالة معينة لحد معين”، هو غالبًا مش هيعرف يوصل غير كدة.

5. المساعد:

أي معلومة عنده مبيبخلش بيها على حد، هو دايمًا بيحاول يساعد اللي حواليه ويعلمهم ويتعلم معاهم، ومبيفرقش معاه نهائي مين هيسبق مين في ترقيات الشغل.