أنواع الولاد المصرية على الفيس بوك

الولد المصري على الفيس بوك يختلف عن أى ولد تاني على مستوى العالم، كفاية أنه مصري، يعني إبن أم الدنيا، وزى ما صوابع إيدك مش واحدة، فالولاد المصرية أنواع في الطري وفي الشجاع.. وعشان كده هنقولك في السطور الجاية على أنواع الولاد المصرية على الفيس بوك.

العميق

صورة البروفايل أبيض وأسود، لازم فيها سيجارة، بيحب يسمع محمود درويش، مبيكتبش زينا عادي لأ، لازم يبقى كلامه كله بالفصحى عشان يدي بعد وأهمية لكلامه، مبيقولش صباح الخير عادي، بيقتبس من كلام بوكوفيسكي “عندما تتقدم في العمر.. الصباحات هى الأسوء” وهو لسه مخلصش جامعة الفاجر، الوحدة منهج، الألم حياة، والموت هو الحقيقة الوحيدة في الحياة، وقوم من قدامه عشان متحسش نفسك غبي أكتر من كده.

الشبح

ده بينزل صوره على كوبري روض الفرج وهو جايب الطقم الجديد من ميدان المطرية، ويكتب فوقيها “واحدة واحدة زميلي ع الرايق أصل أخصامنا بتضايق”، مؤمن أن غدر الصحاب ده حاجة زى أنك فطرت الفول الصبح، رموزه هم نجوم التيك توك، أى حاجة خلصانة معاه بشياكة، ومش هيزعلك عشان انت على حق يابا.

الحكاك

بيتكاثر في مواسم دخول الجامعة، قاعد على جروب الدفعة يبعت أدد للبنات الجديدة، عنده استعداد يسعدهم في أى حاجة، ويحكها مع أى واحدة معدية حتى لو كان هو في تجارة وهي في حقوق، لازم يعمل أى حاجة، النوع ده أسوء من المتحرش.

الكروي المتعصب

وجوده على الفيس مثل تواجد المدير الفني في النادي، والإعلامي المتحيز في القناة، بوستاته وضع تحليلات للماتشات كلام عن الفنتازي الأسبوعي، تحفيل في حالة هزيمة الفريق المنافس، بيختفى مع هزيمة فريقه، ومينصحش تتعامل في الأوقات ديه معاه بيبقى خطر.

الصامت الغامض

ده مش بيشير ولا بيكتب حاجة، الفيس مكان لتغير صورة البروفايل بيكتشر بس، ممكن تنسى أنه عندك أساسًا، بعد سنة ممكن تلاقيه في كومنت عندك بالصدفة وغالبًا بيبقى بيقولك البقاء لله، نشاطه كله على الماسنجر، متحولش تستوك عليه عشان ده مات من زمان بس شكله مخبي علينا.

الأستوكر

ده عنده قدرة على تتبع أى أكونت معدى صدفة قدامك وعايز تعرف معلومات عنه، هيقولك أصله وفصله وعنوانه، وهيديك دخلة كمان عشان تبدأ بيها الكلام لو متعسف، رويترز متحرك، وهتلاقيه بيستوك عليك انت شخصيًا.