ليستات
شروق مجدي١١ يوليو ٢٠٢٠
This article is also available in   Switch Language

٥ أفلام أجنبية اتصورت في مصر

أي حد هيفكر يصور فيلم عن التاريخ غالبًا هتبقى مصر من اختياراته الأولى… والحقيقة إن معظم الأفلام الأجنبية اللي اتصورت في مصر كانت بتركز على حاجتين: الصحرا والأهرامات

احنا جمعنالكم خمس أفلام اتصورت في مصر وطلعتها زي ما هي، واتصورت في أماكن غير الهرم والصحرا.

Valley Of The Kings

هو فيلم أمريكي إنتاج سنة 1954، الفيلم بطولة روبرت تايلور وإليانور باركر، الفيلم اتصور في أكتر من مكان في مصر منهم القاهرة والفيوم والسويس والأقصر، ومش بس كدة .. سامية جمال ظهرت في الفيلم بمشهد بترقص فيه ، والمفاجأة الحقيقية في الفيلم إن رشدي أباظة ظهر كومبارس في دور مغني صعيدي بيقول “يا عزيز عيني وأنا نفسي أروح بلدي”.

The Spy Who Loved Me

“جيمس بوند” سلسلة من أشهر الأفلام في العالم، الحقيقة إن واحد من أجزاؤه اتصور في مصر، وظهرت مصر في الفيلم بشكل جميل جدًا خاصة مشهد كان عند سفح الهرم وشكل الهرم مع الإضاءة كان مبهر، الفيلم اتصور مشاهد منه في بيت الكريتلية ومسجد ابن طولون والأقصروأسوان.. الجزء ده كان بطولة روجر مور وإنتاج سنة 1977.

Cairo Time

الفيلم مش بس اتصور في مصر لكن اسمه “توقيت القاهرة” ويمكن من أكتر الأفلام اللي طلعت مصر زي ما هي وظهر فيه احساس الأجانب لما بييجوا مصر.. بتدور قصته عن صحفية كندية جت مصر وكان المفترض جوزها هيجيلها، لكنه اتأخر فاتعرفت على صديق ليه مصري اسمه طارق اللي هيوريها القاهرة اللي هتقع في حبها وحبه في الفيلم، الفيلم انتاج كندي سنة 2009 وبطولة باتريشيا كلاركسون وأليكساندر سيديج، وظهرت فيه الفنانة المصرية منى هلا في واحد من مشاهده.

City Of Sounds

فيلم وثائقي ألماني بتدور أحداثه كلها عن وفي القاهرة.. إخراج يانيك روميرو وإنتاج سنة 2015، الفيلم بيحكي عن الأصوات في القاهرة من أصوات الناس وصوت الأذان لأصوات الحرف، وعشان هو عن الأصوات فكان بطله الرئيسي واحد من أهم أصوات مصر وهو محمد منير، كمان شاركه البطولة صديق عمره رومان بونكا، وظهر في الفيلم فتحي سلامة ومريم صالح، الفيلم بيظهر معظم شوارع القاهرة من أزهر ومعز لأحياء شعبية بيظهر فيها الأفراح والمحلات.

Whatever Lola Wants Lola Gets

الفيلم فرنسي كندي إنتاج سنة 2007، بطولة لورا رامسي، اللي بتقوم بدور البطلة “لولا” اللي عايزة تتعلم الرقص الشرقي فبتقرر تيجي لمصر عشان تتعلم الرقص وتقابل حبيبها المصري، لكنه بيتخلى عنها وهنا بتبدأ مغامرتها عشان تكون راقصة شرقية مشهورة، الفيلم بيدور في شوارع القاهرة منها مصر الجديدة، وظهرت في الفيلم مريم فخر الدين، وكمان هند صبري اللي طلعت بدور مغنية.

مقالات ذات صلة