أشهر ٥ جمل بتقولها الست المصرية

الست المصرية مميزة دايمًا، معروفة بجدعنتها وشطارتها وإنها بتتحمل المسؤولية ، وزي ما هي مميزة فهي ليها جمل وكلمات بتميزها عن أي ست في العالم، وتخليك تعرفها من بين أي جنسية تانية.

جمعنالك أشهر جمل بتقولها أي ست مصرية أيًا كان شكل علاقتك بيها:

١. خد الزبالة وإنت نازل:

يمكن دي تكون الجملة اللي مفيش ست مصرية مبتقولهاش، وتقريبًا بتقولها لمعظم الرجالة في حياتها من أخوها وجوزها لحد زميلها في الشغل لو مفيش أوفيس بوي يعني.

٢. أنا هطفش ومش هتعرفولي طريق “جُرة”:

ودي غالبًا جملة أصيلة عند الأم المصرية بصفة خاصة وعند الستات بصفة عامة، وده بتعتبره أكبر تهديد – وده حقيقي- لإنها عارفة كويس إن عدم وجودها معناه إن كل حاجة هتبوظ، غالبًا عمر ما التهديد اتنفذ لكن دايمًا احذر إنك لو عصبتها أوي، ممكن التهديد يبقى حقيقة.

٣. يعني أنا اقعد كل ده في المطبخ وفي الآخر متاكلش؟ بتعاملوا البيت إنه بنسيون؟

الجملة دي كراجل هتفضل تسمعها حياتك كلها، في الأول من مامتك وبعدها من مراتك، وبرضو مش بتتعلم الدرس، ولما بتقوللك ياللا الأكل جاهز بتقولها كلت برا.

٤. طب لو قومت وجبتهالك؟

كلنا فاكرين إن الأم بس هي اللي بتعتمد على النظرية دي، لكن مع الوقت بنكتشف إن كل الستات عندهم الملكة دي، وفي أي وقت هتحتاس وإنت بتدور على حاجة هتلاقيها بتقوللك “طب لو جيت وجبتهالك؟” وفعلًا هتلاقيها جت وجابتهالك، الست المصرية مبتغلبش.

٥. الحقوا الغسيل:

ودي بقى بنقوللها لما الدنيا تمطر، في العالم كله هتلاقي الستات بتتبسط بالمطر عشان تنزل تجري أو ترقص تحته، بس مفيش ست مصرية أصيلة معداش عليها مرة عرفت فيها إن الدنيا بتمطر وكان أول رد فعل ليها: الحقواا الغسيل