إعلانات رمضان من زمن فات عمرنا ما ننساها

من صغرنا اتربينا أن رمضان بنشوف فيه أحلى إعلانات، وكل شركة بتكرس كل طاقتها عشان تطلع أجمد حملة إعلانية أنجح من منافسيها.

هنا هنفتكر مع بعض أحلى إعلانات عمرنا ما ننساها مهما مر عليها الزمن.

بيبسي ودنيا سمير غانم

الإعلان دا ببساطة كان قالب الدنيا، بيبسي عملت حملة ناجحة جدا عشان تدعم التعليم، وحملة لتبرع للهدوم وآخر حملة كانت بتدعم إنشاء مراكز شباب عشان الأطفال. دنيا أبهرتنا في الإعلان دا، وكلنا تقريبًا لسه فاكرين كلمات الأغنية. فاكر الإعلان دا كان سنة كام؟

إعلان اتصالات 2010

الإعلان جمع عدد كبير جدًا من الفنانين والمطربين زي يسرا والكنج منير وأحمد عز والفنان الراحل عزت أبو عوف، وهند صبري. الأغنية كان لحنها جميل، والإضاءة والديكور واللوكشين كان كله مبهر، عشان كده كلنا لسه فاكرينها لحد دلوقتي.

إعلان موبينيل 2009

حملة موبينيل في رمضان 2009 تقريبًا كانت من أقوى الحملات الإعلانية، وعلى الرغم إن الإعلان مفهوش أي نجوم أو فنانين إلا أن الأغنية والإخراج كان هايل، وكان معبر جدًا عن حال الكثير مننا في ساعات الصيام.

وأشهرها كان: “أستاذ سبيني في حالي الدنيا صيام”.

إعلان كوكاكولا رمضان 2011

كلنا كنا بنستنى الفواصل الإعلانية بين المسلسلات تقريبًا عشان نشوف الأغنية دي ونغنيها.

الإعلان مبهج جدًا وبيحرك المشاعر وأراهنك لو كنت ابتسمت دلوقتي وأنت بتدندن الأغنية.

“أنت كل حاجة بتحلم بيها.. أنت أملك الوحيد”.

إعلان فوادفون رمضان 2012

“طب وماما؟”

دي كانت الجملة الأشهر في الحملة الإعلانية دي، واللي كان ليها صدى كبير برده، واللي معتز بيقولها وهو بيسألأ على الفنانة الرائعة الراحلة كريمة مختار، فوادفون كانت بتستهدف في الحملة شعار 12 قرش للدقيقة.

ظهر في عدد كبير من النجوم الكبار، منهم الفنان الجميل الراحل سامي العدل، والفنان سمير غانم وغيرهم.

لو ليك أي ذكريات مع إعلانات تانية في رمضان قولنا عليها في التعليقات.