ليستات
أماكن بنروحها كل رمضان بس الحظر مانعنا
ليالي رمضان مكنتش بتحلى غير بمرواحنا لأماكن معينة، عشان كده لما سألنا الناس عن الأماكن اللي كانوا متعودين يروحوها بس الحظر مانعهم السناي قالولنا على أماكن كتير زي:
1- السيدة زينب
بغض النظر عن كل الأماكن اللي ممكن تحس فيها بروحانيات رمضان، بس السيدة دايما ليها جو مختلف، يعني السحور عند الجحش أو الكرابيجي وتفضل تعمل ريفيل لأطباق الفول والمرادي لازم تكتر من الطعمية عالسحور على الرغم إنها بتعطش، وبعدين تلموا نفسكوا وتطلعوا عالرحماني اللي بيعمل سوبيا بتتاكل، واللي لسه مجربش سوبيا الرحماني يبقى أكيد لازم تروح أول ما الحظر ما يتفك، وبعدين نلعب فورتين طاولة على أي قهوة لحد ما الفجر يأذن وطبعا لازم نختم بالصلاة في جامع السيدة زينب.
2- شارع المعز
فيه ناس تحب تفطر في شارع المعز لأنه بيبقى مليان بهجة وناس كتير حواليك اللي بيتصور، واللي بيلعب، واللي قاعد بيستمتع مع صحابه على قهوة من أيام زمان، وفي ناس الجوامع القديمة بتحسسها بجو رمضان زي مسجد الحاكم بأمر الله.
3- عم بشندي
اللي متسحرش من عند عم بشندي اللي في مدينة نصر يعتبر متسحرش في حياته، لأن هناك الأكل بيبقى بخيره كده والكميات كتير عشان تسد معاك في الصيام.
4- المعمورة بالنسبة للاسكندرانية
الاسكندرانية السنادي افتقدوا الفطار عالبحر، وفيه ناس كانت بتسافر من القاهرة لإسكندرية مخصوص عشان بس تفطر أو تتسحر عالبحر وترجع تاني.
5- عم عطية
أشهر واحد بيعمل فول في المعادي هو عم عطية طبعا، كان دايما موجود عند الجراند مول، وأول ما تعدي كده وتلاقي زحمة تعرف على طول إن كلهم واقفين يتسحروا عند عم عطية.
سيبنا ذكريات في أماكن كتير، وعايزين نعمل ذكريات أكتر أكيد أول ما الحجر الصحي ينتهي هنرجع لكل أماكننا اللي اتعودنا عليها.