مدونة
رحمة علي٢٩ أبريل ٢٠٢٠
This article is also available in   Switch Language

بالصور.. مصريين استغلوا البلكونة وخلوهم احلى كافيه

“الجيش بيقولك اتصرف” دي واحدة من المقولات أن احنا كمصريين مؤمنين بيها وبنطبقها بحذافيرها.

أه الحظر اقعدنا في البيت ومنع عننا روح رمضان والسهر لغاية الفجر والقاعدات الرمضانية في كل حتة، بس دا مش معناه أبدًا أننا هنقف ساكتين ومنعملش حاجة.

تحت هاشتاج #رمضان_حول_العالم المصريين أبهرونا للمرة المليون عن إزاي أبدعوا في تحويل بلكونتهم لأحلى كافيه، وعملوا فعلا من الفسيخ أحلى شربات.

علاء بكر حول الروف بتاعه لأجمل قاعدة عائلية تتجمع فيها العيلة كلها، أو حتى لو حد زهق من حد يطلع يفصل شوية. متخيلة نفسي وأنا قاعدة هنا مع كوباية شاي وأغاني الست يا سلام مفيش أحلى من كده فعلا.

أما أماني فهى عملت أحلى قاعدة من سرير ابنها اللي خلاص كبر ومبقتش محتاجها، وعملت المكان الوهمي دا.

أنا مجرد ما شفت الصور انبسطت.

برافو يا أماني.

بص كده حواليك وحاول تشوف أي حاجة بطلت تستخدمها وعيد تصنيعها أو استخدمها بشكل تاني زي أماني وأعمل قاعدة جميلة تغير مودك وتفرحك.

هدى كمان استغلت البلكونة عشان تعمل القاعدة التحفة دي، تسلم أيدك يا هدى.

يعني لو بلكونتك صغيرة زي هدى، برده ينفع تستغلها، بقاعدة بسيطة زي دي ومش هتكلفك كتير.

ونختم بقى مع شيماء اللي كمان عملت قاعدة جميلة جدًا ليها ولعليتها عشان يتجمعوا في رمضان في أجواء مختلفة وتحسسهم بروح رمضان.

يعني قاعدة زي كده أحلى من أي كافيه وكله بتكاليف بسيطة تقدر تنفذها.

الموضوع بس عايز دماغ وروقان.

أنا حقيقي انبسطت واتكيفت. عاش يا مصريين.

وأنت قولنا عملت إيه عشان تحس بأجواء رمضان حواليك في البيت، وناوي تقعد الفنانين اللي فوق دول.