مدونة
رحمة علي٢٦ أبريل ٢٠٢٠
This article is also available in   Switch Language

ليه رمضان السنة دي هيبقى مختلف!

احنا كمصريين رمضان عندنا غير! رمضان يعني قرآن المغرب، وبومب قبل الفطار، وفوانيس وزينة في كل حتة، يعني ناس تقعد ترمي عليك تمر وعصاير وتتحايل عليك تأكل عندها وهما أول مرة يشوفك.

بس للأسف في ظل عصر كورونا احنا مضطرين أحنا نغير كتير من عاداتنا حتى في رمضان.

طيب ليه رمضان السنة دي هيبقى مختلف؟

مفيش عزومات

مين مننا مكنش بيستنى رمضان مخصوص عشان عزمات ولمة رمضان الحلوة؟!

بس للأسف السنة دي مضطرين نلتزم بالتباعد الاجتماعي دا معناه أن مفيش لمة ومفيش عزومات.

مفيش سهر للصبح

تقريبًا كنا بنستنى رمضان عشان نخرج بقى بليل براحتنا ونرجع الساعة 12 بليل وممكن بعد كده كمان ونحس أنه بدري.

بس للأسف السنة دي في حظر تجول من الساعة 9، يعني تقريبا مفيش خروج أصلًا، يدوبك بقى نأكل ونأنتخ.

مفيش صلاة تراويح

الصلاة التراويح كانت بتزيد لرمضان متعة فوق المتعة، بس السنة دي وزارة الأوقاف أعلنت غلق الجوامع.

الإجراء دا طبعًا اتاخد في دول كتير على رأسها السعودية اللي وقفت صلاة الجماعة في الحرمين.

فلأسف رمضان دا هنتحرم فيه من أحلى ما فيه.

مفيش سحور ولا فطار بره

كتير مننا كان بيحب يفطر بره في جو رمضاني مختلف وبعيدًا عن روتين أكل البيت كل يوم، وطبعًا السحور بره كان ليه سحره الخاص، بس رمضان دا المطاعم كلها قافلة ومقتصرة على التيك واي، يعني هنأكل كل يوم من أيد ست الكل ربنا يخليهالنا.

مفيش موائد الرحمن

للأسف من ضمن اجراءات السيطرة على كورونا، أعلنت الدولة وقف أي أنشطة في رمضان وتندرج تحتيها موائد الرحمن، يعني الترابيزات اللي كانت بتتفرش في كل حي في مصر تقدر تأكل عليها زي ما أنت عايز ومش مهم أنت مين ولا جاي منين، مش هنشوفها في رمضان دا.

يمكن الاجراءات صعبة شوية على كتير مننا، بس لازم نبعد النهارده عشان نتجمع بكره.

وأنت متنساش تقولي إيه أكتر حاجة هتفقتدها في رمضان السنة دي!

كل سنة وأنتوا طيبين.

مقالات ذات صلة