٦ أنشطة تعملوها مع ولادكم وقت الحظر

في الوقت اللي ولادنا قاعدين فيه من المدرسة ومعظمنا لجأ للشغل من البيت كإجراءات احترازية للوقاية من الكورونا ضمن خطة الدولة المصرية، أكيد كلنا هنحس بالزهق في لحظات.

وعشان حالتنا النفسية مهمة جدا لمناعتنا، وعشان هم كانوا بيزهقوا بسرعة، في العاب كتير وأنشطة ممكن نعملها معاهم ونضيع وقت:

١- ألعاب الأفلام:

دي من أكتر الألعاب المشهورة اللي ممكن تلعبوها مع ولادكم -لو هم كبار شوية- وهتنمى عندهم التفكير وقدرتهم على التعبير عن أفكارهم.

٢- اقروا سوا:

ممكن تجيبوا قصص وبدل ما انتوا تقروها لولادكم، هم اللي يقروهالكم، واتناقشوا كمان فيها بعد ما تخلصوا عشان يتغير تفكيرهم عن القراية.

٣- اتفرجوا على فيلم:

اختاروا فيلم مشافوهوش واتفرجوا عليه كلكم سوا، فيلم واقعدوا اتناقشوا فيه بعدها، وده هيخليهم يفكروا في الأفلام بشكل مختلف عن اللي اتعودوا عليه.

٤- اعملوا اكسسوارات:

لو عندكم – او تقدروا تنزلوا تشتروا خرز- اعملوا معاهم سلالسل وغوايش بيه، دي من أكتر اللعب اللي بيستمتعوا بيها.

٥- اطبخوا سوا:

شوفوا أكلة بيحبوها وعلموهم ازاي يعملوها واعملوها سوا، او اكلات صحية مبيرضوش ياكلوها، وخلوهم هم يعملوها هيستمتعوا بده، وهتخليهم يحبوا الأكل.

٦- العبوا رياضة:

عشان الجيل الصغير متعلق أكتر بالتكنولوچيا مبيلعبش رياضة كتير فممكن نستغل الوقت ده ونعلمهم أهمية الرياضة في يومهم، ونلعبها معاهم.