حاجات منحبها
٤ أماكن تخرج وتتنطط فيها وتطلع الكبت
الحياة صعبة، كل يوم شبه اللي قبله، روتين ما بين شغل أو دراسة ونجري على البيت عشان نصحى نعمل نفس اللي بنعمله كل يوم.
طيب لو أنت كمان كده، فاطمن أنت مش لوحدك، وعشان كده جبنالك النهارده خروجات مميزة بعيدًا عن القاعدة في الكافيهات، واللف في المول، خروجات هتغيرلك مودك فعلا.
يلا نشوف.
Sky Zone Egypt
لعشاق التنطيط والفرهدة، أو اللي يببقي عندهم طاقة زايدة ومكسوفين يعملوا دا في أي مكان.
دا مكان مخصص لإفراغ أي طاقة مفرطة عندك، هتروح تنام ومش عايز حاجة تانية من الدنيا.
المكان موجود على مساحة كبيرة حوالي 650 متر، وفي أنشطة كتير جدًا، من ألعاب ال VR أو تلعب هوكي، ولو مش عارف روح اتشقلب وخلاص محدش هيقولك حاجة.
هى 50 جنيه وتقدر تنطط لمدة ساعة كاملة على أكبر الترامبولين الموجودة فى مصر، بس الكلام دا من يوم الأحد والأربعاء، الخميس والويك أند بتبقى ب100 جنيه.
والمكان موجود في داندى مول في 6 أكتوبر.
جدف في نهر النيل
التجربة حلوة جدًا، وحقيقي مختلفة، وتقريبًا كل اللي جربها يرجعلها تاني، وأحلى حاجة أنك مش بس هتغير جو وتنبسط، أنت هتتعلم حاجة جديدة وهى التجديف، ومش لازم خالص تكون حريف.
كتير من اللي بيروحوا بتبقى المرة الأولى ليهم، عشان في حد هناك محترف هيعلمك لمدة 10 دقايق، وهيفضل معاك عشان متقلقش خالص، ولو مش بتعرف تعوم، هيديك لايف جاكت، يعني أنت في الآمان يا معلم.
المكان موجود عند نادي يخت الجيزة، جنب لاتينو كافيه، وبيفتحوا يوميًا من 3 العصر لحد 7 مساءًا، وبتدفع 80 جنيه.
طيب لو عايز تبقى ممارس بقى مش هاوي، بيقدموا هناك كورسات كمان، روح واسأل عن اللي أنت عايزه.
حديقة الجيزة – سفارى بارك
طيب لو مش ليك في المياه بقى، وبتخاف، يبقي خليك في الآمان وروح جنينة حلوة كده وهادية وبرده مناسبة ليك ولاصحابك زي سفاري بارك.
ودي عبارة عن مكان كبير هتقضي فيه يوم كأنك سافرت لقرية في ريف مصر، بس حاجة منظمة ونظيفة وجميلة.
دا غير فيها برده شوية ملاهي، وركن مناسب للعائلات والأطفال مش بس للأصحاب.
والدخول ب10 جنيه بس، وفي رسوم لكل لعبة بيتراوح برده في السعر دا.
المكان بيفتح يوميًا من 9 ل11 بليل، وهو موجود أسفل الدائري بجانب محور أحمد عرابي الجديد.
Immersive VR
لو بتحب لعبة PUBG يبقى لازم تروح هناك، عشان هى محاكاة للعبة على الحقيقة، ومناسب جدًا للأصحاب والشلل سواء بنات أو أولاد.
مش بس بابجي هما عندهم أكتر من 100 لعبه، هما موجودين في مول سكاي بلازا في شارع التسعين بالتجمع الخامس، وسعر التذكرة بيتحسب على حسب عدد الساعات.
وأنت قررت تروح حاجة من مقترحاتنا، ولا هتقضيها أنتخة كالعادة