4 شخصيات هتقابلهم في اي سبوع لمولود جديد

السبوع يعني فرحة جديدة وبهجة بتعم علي البيت لما يشرف مولود جديد، والعيلة تزيد واحد، أوي أتنين علي حسب.

بس برضه حتي وأنت بتفرح هتلاقي ناس غريبة جدًا وأفعالها أغرب بالضبط زي الفرح، هتلاقي فيه أنواع مختلفة من الناس.

النهارده بقي هقولكم علي 4 شخصيات زلام هتلاقيهم عدوا عليك في أي سبوع روحته قبل كده:

1. الشخص المراقب:

ده ممكن يكون شخص واحد أو مجموعة أشخاص مبيعملوش حاجة أنهم يراقبوا ويفصصوا كل حاجة في البيت، بداية من البالونات اللي متعلقة علي الحيطة ولحد نوع الملبس اللي بيتوزع عليهم.

دول بقي متشغلش دماغك بيهم، لأن غالبًا مفيش حاجة هتعجبهم حتي لو جبتلهم لبن العصفور.

2. الشخص المُصور:

ده هتلاقيه photographer في نفسه كده، ومش شرط يكون معاه كاميرا، ويمكن كمان مش تليفون أحسن حاجة بس يحب يوثق كل الأحداث ويذل الناس بيها بعد كده.

الشخص ده متحاولش تعدي من قدامه لانه غالبًا هيكون معاه فيديوهات وسيديهات يتريق عليك بيها لسنين قدام.

3. الأم المُحرضة:

ايوه الأم المُحرضة ودي طول الوقت هتلاقيها ماسكة ودان عيالها عشان يروحوا يجيبوا أكل زيادة من عمو اللي هناك أو بالونات وملبس زيادة، أي حاجة وخلاص المهم متطلعش من السبوع وأيدها فاضية.

4. الشخص الفرفوش:

وده هتلاقيه بيفرحلك بجد، وبيعمل كل حاجة من قلبه كده، بيرقص ويطنطت من قلبه. والشخص ده هتلاقيه غالبًا مش بيفرق معاه التصوير أوي وبيكون عايز يستمتع باللحظة ويفرح مع الناس. هتلاقيه دايس في كل حاجة في الرقص وتوزيع الأكل وتوزيع المشروبات، كل حاجة.

ده بقي متفرطش فيه لأنه بيفرحلك بجد.

يلا قولولنا لو شوفتوا أنواع تانية في أي سبوع روحته قبل كده وأكتبولنا في التعليقات.