ليستات
رحمة علي١٠ أكتوبر ٢٠١٩
This article is also available in   Switch Language

٤ مسلسلات مصري عمرنا ما نزهق منهم مهما اتفرجنا عليهم

مفيش أحلى من زمن الدراما المصرية القديمة اللي كل ما نشوفها شغالة على التليفزيون بنرجع نتفرج عليها تاني وتالت ورابع عادي جدًا، ونكتشف سيناريو رائع يصلح لكل زمان ومكان، بنتفكر هنا بعض المسلسلات اللي بتخلينا نفخر حقيقي بالدراما المصرية.

عطا

مين ينسى “هدى هانم، اللي قامت بدورها جميلة الجميلات ليلى علوي، وهي بتنادي على جوزها المراكبي “عطا”، اللي قام بدوره الفنان الرائع أحمد خليل.

المسلسل هو عن رواية أديبنا العالمي نجيب محفوظ، عن رحلة الحياة والموت، في ملحمة رائعة ضمت كل نجوم الدراما، ودا اللي خلاها مسلسل ناجح بامتياز، كلنا بنسيب اللي في إيدينا ونتفرج عليه أول ما نشوفه شغال.

3 على واحد يدوب.. 4 على واحد حرام

دا اللي مرتات الحج متولي عملوه لما راح اتجوز للمرة الرابعة، وعلى الرغم من الجدل اللي عمله المسلسل ساعتها حول قضية تعدد الزوجات، إلأ أن شخصية الحج متولي ومراته أمينة، اللي قامت بدورها صاحبة الروح الخفيفة الفنانة ماجدة زكي، والفنانات غادة عبد الرازق وسمية الخشاب، عمل المسلسل حالة مصرية خالصة، وخلاها من علمات الدراما المصرية.

وعلى الرغم من محاولة تكرار تجربة المسلسل في العطار و7 بنات، إلا أنه مقدرش يحقق اللي حققه الحج متولي.

تتر مسلسل الضوء الشارد

احنا ممكن نعتبر تتر مسلسل الضوء الشارد أيقونة لوحده، الفنان الراحل الجميل ممدوح عبد العليم ابدع الحقيقة في دوره “رفيع بيه”، والفنانة الجميلة منى ذكي، والأم الصعيدية الجامدة جدًا اللي قامت بدورها سميحة أيوب.

أنا مستعدة لو عرفت الضوء الشادر شغال دلوقتي اقوم اتفرج عليه للمرة العاشرة، وأكيد أنت كمان.

جماعة انتوا ليه؟

مسلسل الحقيقة والسراب رجع يظهر تريند تاني، بشخصية باسم “الفنان أحمد سعيد عبدالغني”، وهو أستاذ في التحوير وشاب روش وجامد جدًا، بس الحقيقة أنه يشتغل كل اللي حواليه.

الفنانة المبهجة كمان فيفي عبده، كان دورها رائع، يخلينا دايما نتفرج عليه تاني وتالت ورابع.

لو تعرف أي مسلسل من دول شغال دلوقتي على أي قناة قولنا وخلينا كلنا نتمنتع بالأعمال المصرية الجميلة دي.