قبل الكوكا كولا والبيبسي المصريين كانوا بيشربوا ايه؟

تاريخ المصريين مع الحاجة الساقعة مش جديد ولا حاجة، ده تاريخ قديم تقريبا أكتر من 115 سنة والمصريين بيشربوا حاجة ساقعة، ورغم التاريخ الطويل ده إلا أن أصلا الحاجة الساقعة دخلت مصر متأخر جدا، الاختراع اللي عمله العالم جوزيف برستلي1767 وطبقه يوهان شويب سنة 1783، وأسس شركة شويبس المشهورة، دخل مصر في سنة 1901، وكان اسمه كازوزة.

الكازوزة

هي أول مشروب غازي يدخل مصر وتحديدا كان في اسكندرية وكان ب 3 نكهات المشروب العادي اللي هو الأسمر ده وبنكهة الفراولة ومياة غازية بنكهة الليمون.

الكازوز الوطني

نجاح كازوزة في الانتشار شجع شركات كتير إنها تنتج المشروب ده فظهرت ماركات. ودي كانت من المشروبات المشهورة جدا وكانت بالبرتقال بلونها البرتقاني اللطيف ده واتعمل منها الليمون كمان، سيدرا أو سيدر كان الوريث الشرعي لماركة قديمة إسمها عصير كوثر وكان في منها بالرمان والفراولة والبرتقال والليمون واتحولت لسيدر بعد كدة.

بسكال

دي المرادف الموضوعي للكوكا كولا وماكنش في منها غير نوع واحد بس وهو الكوكا

استرا

واحدة من انجح الماركات وأشهرها وكانت بطعم البرتقال.. لكن فجأة ظهر العملاق اليوناني سبيرو سباتتس ونحلته علشان يكوش على السوق كله.

سباتس SPIRO SPATHIS

سبيرو سباتس راجل يوناني لطيف كان بيشتغل في مجال المناحل والعسل والمشروبات في اليونان وجه مصر، وعمل مصنع سبيرو سباتس في شارع خليج الخور في عماد الدين وبدأت الرحلة، الرحلة للمشروب اللي فعليا فضل بيتم إنتاجه لحد 2004 انا شخصيا شربت سباتس في استوديو عماد الدين في شارع عماد الدين وكانت نوعين يورا وسبيرو سباتس.

سبيرو سباتس كانت من الشركات القليلة اللي دعمتها الحكومة المصرية سواء في العهد الملكي أو العهد الجمهوري وكانت المشروب اللي بيتم توريده للوزارات والهيئات لحد ما دخل القطاع العام في اللعبة.

مصر للمشروبات وفي قول أخر تيم وكراش TEEM & CRUSH

دي الشركة اللي فضلت شغالة فترة طويلة جدا لحد ما قفلت من قريب وهي اللي كانت بتعبي الكوكا كولا والبيبسي لما دخلوا مصر قبل ما يعملوا مصانعهم هنا. مصر للمشروبات أو مصروب كانت شركة ليها ماركات كتير أشهرهم طبعا سبورت وتيم وكراش، لكن قبل التلاتة دول كان في ماركات زي ليمونادا وها سبورت وغيرها كتير، وبس يا سيدي دخلت كوكاكولا مصر ودخلت بيبسي مصر واختفي كل دول.