مشاريع
كارلوس أنيس٢٦ أغسطس ٢٠١٩
This article is also available in   Switch Language

٥ أماكن رومانسية في إسكندرية لازم تجربهم

إسكندرية تعشق البحر والبحر يعشق إسكندرية، والرومانسية موطنها كوبري ستنالي مش باريس يا جماعة، وزى ما إسكندرية شهدت قصص حب بعدد رمل بحرها، الأماكن الرومانسية اللي فيها كتير، بس أحنا هنرشحلك أماكن رومانسية في إسكندرية لازم تجربهم…



١. Sky 7– سكاى 7



واحد من أكتر الأماكن الرومانسية اللي ممكن تاخد فيها حبيبك في إسكندرية، تحت السما وفي وش البحر، خدمة ولا أروع، وخصوصية جميلة، جو مهيئ أنك تقول كل اللي نفسك فيه وملكش حجة، هتلاقي عبارة كده عندهم بتقول “على الأقل نحن نحتفل تحت نجوم السماء”… أظن أن الرسالة وصلت وأنك لازم تجرب المكان ده.



٢. Chocolate Factory



زى ما المكان بيقول “نداء لجميع محبي الشيكولاته”، المكان ده أكتر مكان رومانسي ولذيذ في نفس الوقت ممكن تاخد ليه حبيبك عشان تجربوه، المكان بيتميز أنه واحد من أشهر الأماكن في الإسكندرية اللي بتقدم الشيكولاته، بتعملها قدامك وبتلاقي مكن الشيكولاته في الواجهة أول ما تدخل، ده غير ريحته اللي هتجري ريقك عشان تاكل المحل كله… عرفت ليه لازم تجربه.



٣. سان تروبيه – St. Tropez



ده يعتبر قبلة للعُشاق في إسكندرية، هو مطعم كلاسيكي كده وحلو في كفر عبده، في كل أوقات السنة بيبقى حريص أنه يحافظ على طابعه الرومانسي، عازف جيتار، أضواء هادية رومانسية، ويا سلام لو رحته في عيد الحب، الإنارة بتقى شموع وحاجة في منتهى الدفيء والرومانسية.. خد حبيبك وجربه هتحبه.



٤. سانت لوتشيا



لو نفسك في جلسة رومانسية كلاسيكية على أنغام البيانو يبقى اختيارك سانت لوتشيا في محطة الرمل، المطعم يوناني إيطالي، بيقدم أكل لذيذ وفخم، خدمة ممتازة، وعشان كده بيبقى اختيار كتير من الرومانسيين في إسكندرية عشان يقعدوا قعدة رايقة، بعيدة عن الدوشة والزحمة، كلها حب وتفاهم.. هتحب تقعد فيه.



٥. سان جيوفاني، ستانلي- San Giovanni



سان جيوفاني ده فندق اتأسس في 1938م، بس هنرشحلك المطعم والكافيه بتاعه اللي أخد تقييم 5 نجوم، عشان أكله اللذيذ جدًا المعروف في إسكندرية كلها، والطابع الكلاسيكي بتاعه ونغامات البيانو اللي مش بتتقطع منه، خليته خيار لكتير من الناس اللي حابيين يقضوا يوم رومانسي في مكان بيطل على البحر مباشرة وكوبري ستانلي الساحر.. خش شوف القعدة والأجواء خيال.



مقالات ذات صلة