٧ حاجات هتسمعها من مامتك وأنت نازل المدرسة الصبح

وقت المدرسة ده بالذات كان مليان ذكريات وأحداث كتيررر…

من ساعة ما تصحي من النوم بالعافية وبعد محاولات قاسية من أنك تطفي المنبه، وفي الأخر تقوم بعد عذاب..لحد ما تنزل للباص أو تركب للمدرسة اين ما كانت موصلتك..

كلنا عشنا الذكريات الصعبة دي بطريقة أو بأخري ومهما أختلف الزمن وعدت السنين..

هتلاقي كلام الأمهات مبيتغيرش..

وخصوصا وأنت نازل الصبح هتسمع كلشيهات من الأمهات مختلفتش علي مدار الأجيال..

١ . كُل أكلك كله:

مهما كانت ساندوتشاتك..واخدهم في كيس بلاستيك شفاف أو لانش بوكس..برضه هتفضل تسمع الجملة دي

وهيبقي يوم مطلعطلوهش شمس لو رجعت برغيف واحد..

ويا سلام بقي علي الأم اللي تقولك كُل ساندوتشاتك في الفسحة وبعدين أبقي ألعب..أو مثلا أنك متعزمش علي حد بأكل..

٢ أشرب اللبن كله علشان تكبر:

كلام سمعناه كتير ولسه بيقال لغاية دلوقتي..

وكأن اللبن بس هو اللي بيكبر..ومفيش حاجة تانية..مع أن في عصاير فريش مثلا..

طب أفرضي أنه مبحبش اللبن وده وارد انه يحصل..

لأ أزاي أنت كده مش عارف مصلحتك وتفضل تظغطك بالعافية لحد ما تبقي مش طايق نفسك..

٣ . أسمع كلام الـ teacher بتاعتك:

وكأن الأمهات طول الوقت بيفتكروا أن أولادهم هيطلعوا مشاغبين وبس..

مش أن طفل عنده نشاط زيادة، لازم يبقي مشاغب في الفصل..بالعكس ممكن يكون مبيحبش التجمع مع ناس مثلا ميعرفهومش أو لسه

جديد عليهم

٤ . يلا هتتأخر علي الباص:

ممكن حتي تسمع الجملة دي وانت لسه صاحي الساعة 5 الصبح..

أمهات كتير مش بتأخد بالها انها بتأفور في حاجات ممكن تكون بسيطة ومش مستهلة .. وده بيحصل لمجرد الشعور بالخوف الزيادة علي

أطفالهم

٥ . متعملش Nosie في الفصل:

وكأن الطفل الشقي ده مصاب بوباء .. مع أن برضه في أمهات كتير تقول ” أنا أبني هادي مش عارفة ليه “!

الأدب أكيد شئ جميل في الفصل عشان يقدر يستوعب كل الدروس..لكن كبت الأطفال لمجرد أنهم يسكتوا، ده اللي بيكون صعب جدا

٦ . متصرفش مصروفك كله:

طب سؤال بس..كنتي بتديه المصروف ليه لما مش عايزاه يصرفه..سؤال حير الجميع!!!

٧ . متعملش شقاوة في الفسحة:

الفسحة أصلا معمولة عشان الشقاوة والتنطيط..لانهم قاعدين حوالي 4 أو 5 حصص مستنين الفسحة بفارغ الصبر عشان يلعبوا أو يشوفوا صحابهم..

ألعبوا يا أولاد وملكوش دعوة بماما..