أكل وشرب
عوض صليب٢٤ يوليو ٢٠١٩
This article is also available in   Switch Language

مطاعم من غيرها زيارة الأقصر متكملش

من النصايح المهمة في حجز الفنادق إنه بلاش تحجز إقامة كاملة Full Board علشان يكون عندك فرصة تجرب مطاعم مختلفة وأكلات محلية، وفي الأقصر كذا مطعم بننصحك بيهم لأنهم بيقدموا تجربة مميزة.


سفرة



مطعم وكافيه سفرة من الأماكن المريحة نفسيا في الأقصر، وفي أماكن كتير للقعدة سواء في الجنينة الصغيرة في الدور الأرضي أو التراس والمطعم فوق اللي بيتميز بالطراز العربي.



المنيو شرقي جدا من أول المقبلات اللي فيها بتنجان مخلل على الطريقة المصرية وجبنة بالطماطم وبابا غنوج، وفي الشوربة هتلاقي شوربة فركة وشوربة عدس، وعلى عرش الأطباق الرئيسية يتربع البط بلا منازع ومعاه الحمام المحشي والملوخية بالأرانب وطاجن البامية بالموزة.



حارة الصحابي



حارة الصحابي منقدرش نقول إنه مطعم مصري خالص لأن المنيو فيه أصناف لبناني وإيطالي، بس الأصناف المصرية عنده مميزة جدا، زي شوربة العدس والملوخية ومحشي ورق العنب والطواجن المعمولة بالفريك زي لحم الجمل والفراخ، وطبعا المطبخ المصري لازم يكون فيه حمام محشي.



المنيو كمان فيه أسماك وفطاير وخضروات، والحلو فيه حاجات كتير منها أم علي ومهلبية وسلطة فواكه.


المرسم




فندق ومطعم المرسم من الأماكن اللي مهم تزورها في الأقصر مش بس علشان الأكل لكن التجربة نفسها، علشان المكان عمره 80 سنة في البر الغربي، والمطعم في مكان مفتوح فالمنظر هناك بالليل تحفة جدا. المنيو هناك فيه اختيارين للغدا: غدا خفيف بتختار فيه 4 أصناف خفيفة زي الأومليت والفلافل، وغدا كامل فيه المشويات والأسماك والطواجن.


ذا لانترن روم



ذا لانترن روم The Lantern Room واخد شهادة امتياز من Trip Advisor وهو مطعم بيقدم أكلات مصرية وغربية، مع اختيارات مناسبة للنباتيين، واختيارات تانية خالية من الجلوتين.



الضيافة هناك مميزة والمنيو متنوع بين الطواجن المصرية والأكلات الغربية المشهورة، ومن الحاجات المميزة أطباق السمك والبطاطس.



مقالات ذات صلة