أكل وشرب
تذوق ايطاليا فى قلب القاهرة
ايطاليا ليها سحرها, و تذوق الاكل الايطالي الاصلي هو فعلا تجربة مختلفة و مميزة. الاطباق الايطالية فيها عدد كبير من العناصرالطبيعية ونكهات ممزوجة بماعيير دقيقة, قليلين اوي اللي يعرفوا اسرارها. لحسن الحظ القاهرة فيها مطاعم ايطالية كتير, منهم اللي لسة بيجتهدوا عشان يوصلوا لطعم الاكلات الصح, و منهم زي ما بنقول كدة بالبلدي شربوا الكار على طول…
المطعم ده عرف يجيب الطعم الايطالي المظبوط و يوصلّوا لحد عندنا فى شيراتون المطار. الشيف سليم, رئيس الطهاة فى الا جرانده, عنده ٢٥ سنة خبرة فى خبايا المطبخ الايطالي, خبرة توديك على ايطاليا و ترجعك مع كل معلقة. عيش ايطالي طالعلك من الفرن هتلاقي, اللازانيا السايحة حبيبتنا هتلاقي , ده غير ١٥ نوع مختلف من البيتزا الايطالية المتأصلة مخبوزة فى فرن الطوب المتعتق.
Sapori Di Carlo / سابورى دى كارلو
سابوري بالايطالي يعنى نكاهات, و كارلو هو رئيس الطهاة في سابوري دى كارلو . المطعم موجود فى الزمالك و مفتوح اليوم كله , فطار,غذاء, عشاء, و بيقدم مجموعة كبيرة من الاطباق. سابورى دى كارلو مشهور بجبنة البوراتا الكريمي وطبق البانا كوتا, من اشهر و اشهى الحلوى الايطالية.
اللي بيميز انديامو هو اجوائه المبهجة و مفهوم المطعم المميز. منيو انديامو فيه اطباق متنوعة و مستواها عالى , لكن الفرق انه مش مجرد مطعم تاكل فيه وتمشي. موسيقى و اغاني شغالين على طول, و حفلات تقيلة فى نهاية كل اسبوع,جو يخليك تفصل من تعب الاسبوع كله. يستحسن تحجز قبل ماتروح , بالذات لو خميس او جمعة . فروع ٦ ا كتوبر و الساحل الشمالي اكبر من فرع هليوبلس, بس التلاتة كمستوى خدمة متقاربين, و من غير متسافر هو بيحسسك انك سافرت و انت فى القاهرة!
معك فلوس؟ لو معاك يبقى كمل قرأة . فى مود شياكة و نفسك فى معاملة خمس نجوم مع اكل ايطالي حلو بزيادة؟ لو كدة يبقى بيلا هوالمكان المناسب ليك. مكانه ارستقراطي من الدرجة الاولى فى فندق الفور سيزونز – القاهرة – نايل بلازا. مطبخ بيلا مفتوح على المطعم , مفيش الزهق المعتاد و انت مستني اكلك. هتتفرج على مهارة الطهاة وهتتذوق الاكل بعينيك ومناخيرك قبل لسانك.
مستوحى من مدينة نابولي الايطالية, مطعم اُوصل ميو بيعتمد فى اكله على استخدام المكونات الخام الطازجة التابعة للمدينة العريقة. الجديد ان المطعم قدر يوصل للتوازن ما بين الابتكار و الحفاظ على اصول المطبخ النابوليتاني. هتلاقي فى المنيو كل الاطباق المعروفة مع اضافة لمسة متطورة بتميزه عن باقي المطاعم, زي مثلاً طبق الريزوتو بالبنجر و طبق الاسباغيتي الوردي, الوان مش هتلاقيها فى اي مكان تانى. المطعم موجود فى ابراج نايل سيتي على كورنيش النيل, و في مول و سينما فى نفس المكان للي عايز يكمل خروجته.