صالات جيم قريبة منك في أكتوبر

الصيف داخل ولازم الكل يجهز فورمة المصيف، وعلشان نظبط جسمنا، ونهاجم اللي الشتا عمله فينا وفي وزن جسمنا، لازم نقوم نروح الجيم ونبطل كسل، في الكلام الجاي هنقولك، ايه الجيمات القريبة منك في منطقة اكتوبر، واللي موجودة في اكتر من مكان، علشان ميبقاش ليك حجة، وتقوم تلعب رياضة.

ZEUS GYM

جيم زيوس، موجود في مول جلوري 45 قريب من سيتي سكيب، ووبيكون مفتوح 24 ساعة، وفيه وقت للتدريب ميكس بين الشباب والبنات، وفيه أوقات مخصصة للبنات بس، المميز في جيم زيوس أنه مساحته كبيره والتهوية كويسة، وكمان فيه مدربين بيساعدوك وقت التمارين، وكل فترة بينزلوا عروض للإشتراك بأسعار مناسبة جدا، وعندهم كلاس للكيك بوكسينج، وفيه أيروبكس كمان.

ORANG GYM

جيم هادي ورايق، وكمان فيه ساونا وجاكوزي، وتقدر تستخدم كل المميزات دي في فترة إشتراكك سواء كان شهري أو سنوي، مواعيده طول اليوم، وفيه أماكن مخصصة للبنات، وكمان فيه صالة تدريب ميكس، وتقدر تشترك مع نفسك، او مع مدرب خاص بيك يتابع معاك طول فترة التدريب، كمان عندهم دروس رقص، وزومبا، وأيروبكس.

H2O GYM

عاش يا وحش، لو بتحب تتمرن وسط جو مليان زعيق وحماس وعاش يا وحش، وكلام من ده يبقى انت تروح إتش تو أو فرع أكتوبر للرجال فقط، الجيم له فرعين في نفس المكان ولكن واحد للشباب فقط، وواحد للبنات فقط، إتش تو أو بيتميز أن مساحته كببرة جدا، وفيه أجهزة كتيرة، وكل جهاز منه موجود منه كتير يعني مش هتلاقي جهاز مشغول.

Gold’s Gym Egypt

الجيم يعني جولدز جيم، الجيم العالمي ليه فروع كتير في مصر، لمحبي التميز والروقان، جولدز فيه مميزات كتير منها عروض الإشتراك المتنوعة حسب المدة، وانت عايز ايه، الجو الحماسي هناك يخليك تتشجع أكتر علشان تحقق أهدافك في وقت أسرع، مع مدربين معتمدين وعلى أعلى مستوى، وعندهم سيشن متنوعة سواء كان يوجا، أو زومبا، أو فيتنس، ورقص.

BEAST GYM

أجهزته المتنوعة، والمدربين الشاطرين اللي هناك، المزيكا حماسية وهتخليك تطلع كل اللي عندك، وتوصل لهدفك من التمرينة، عندهم عروض للاشتراك زي ما تحب، والاشتراك شامل كلاسز الزومبا و الايروبكس، وفيه مواعيد مخصصة للسيدات.