مشاريع
محمد محسن٠٩ أبريل ٢٠١٩
This article is also available in   Switch Language

خروجات مختلفة.. أماكن لازم تزورها في القاهرة

لو جاي القاهرة صد رد، أو انت أصلا عايش هنا، ومتعرفش عنها كتير إلا الخروجات المعتادة، تعالى أقولك على شوية افتراحات، لأماكن ممكن تروحها وقريبة منننا، وكمان مش هتصرف فلوس كتير، خليني أقولك في السطور الجاية.

شارع المعز

شارع تاريخي في القاهرة، أول ما تدخله بتحس انك رجعت لعصر الدولة الفاطمية في مصر، ويعتبر متحف مفتوح للآثار الاسلامية، فيه بوابتين من أبواب القاهرة الفاطمية، وهم باب زويلة وباب الفتوح، وفيه مسجد الحاكم بامر الله، غير مساجد وأماكن كتير موجودة من أيام العصر الفاطمي، ودخول الأماكن دي بيكون بأسعار رمزية جدا، كمان فيه مركز الربع الثقافي اللي بيعمل حفلات انشاد وتواشيح، وبيتم في شارع المعز عروض تنورة وأجواء فلكلورية هتعجبك.

محمية دجلة

لو انت من هواة التخييم والصحرا، مش محتاج تخرج من القاهرة، لان فيه جنبنا وبالظبط قريبة من المعادي، محمية وادي دجلة، واللي فيها صخور من الحجر الجيري، كمان فيه أنواع كتيرة من النباتات، كمان حيوانات وطيورة نادرة وبالمناسبة بتكون آليفة وصديقة للإنسان، ومش مؤذية، تقدر هناك تتمشى وتخيم مع صاحبك، كمان تركب عجل لو عايز، ودخول المحمية بمبلغ قليل ورمزي.

القرية الفرعونية

باين من اسمها أن كلها فراعنة في فراعنة، كل حاجة هناك فرعوني، الأماكن هناك والمطاعم بديكور فرعوني رائع، كمان فيه يخت فرتاري، بيعمل جولة في النيل لمدة ساعة ونص، فيه أماكن مخصصة للاطفال منها حديقة حيوان أليفة، فيه ستوديو كليوبترا للتصوير بزي فرعوني، وفيه لعبة الهروب من المقبرة، علشان تلعب شوية مع المومياوات الفرعونية المرعبة، فيه أكتر من متحف في القرية الفرعونية مش بس فرعوني لكن فيه قبطي وإسلامي ومتاحف للتاريخ المعاصر.

وسط البلد

مش هقولك على حاجة معينة في وسط البلد، التمشية لوحدها في شوارع وسط البلد بين العمارات القديمة، ديخروجة عظيمة، مناظر المباني اللي لسه محافظة على شكلها يتفح النفس، طبعا لو أكل أو شرب أو تسالي فكل حاجة هتكون موجود تقدر تقعد تاكل وتقوم تكمل تمشية، العلامة المميزة لوسط البلد طبعا هو ميدان التحرير، بس خلي بالك الميدان هو البداية بس، لسه جو الشوارع فيه عالم تاني لازم تشوفه.

لو مش عارف ميدان التحرير بيروحوله إزاي، فمحطة مترو السادات هي محطة المترو اللي في الميدان، كمان منطقة وسط البلد فيها محطات مترو تانية، زي العتبة، ومحمد نجيب، وسعد زغلول.

مقالات ذات صلة