مشاريع
محمد محسن١٣ أبريل ٢٠١٩
This article is also available in   Switch Language

للروقان والانبساط.. تخرج فين في الإسكندرية

لو انت من اسكندرية أو رايح طياري وراجع فيه أماكن كدا في اسكندرية، لازم تروح تعدي عليها، الاماكن اللي هقولهالك دي ملهاش أي علاقة ببعض كلا العلاقة بينهم انك هتروق وتنبسط على الآخر هناك.

أوبرا الإسكندرية

أوبرا اسكندرية أو مسرح سيد درويش زي ما بيقولوا عليه، من اسمها باين انه بتعمل حفلات مزيكا، للسلطنة والدماغ العالية، كمان بيعملوا مهرجانات فنية مختلفة، وبيكون فيها مزيكا من كل أنحااء العالم، اعرف أكتر عن فعالياتهم وأنشطتهم من موقع دار الأوبرا المصرية.

متحف الأحياء المائية

هو متحف من النوعية النادرة، ومش كتير هنلاقي متاحف للأحياء المائية حوالينا، المتحف فيه أنواع كتير من الأسماك اللي بتعيش سواء في البحر المتوسط، أو البحر الأحمر، أو في النيل، المتحف سعر دخوله مش كتير وبتكون أقل من 10 جنيه للفرد، وبيكون مفتوح من الساعة 9 الصبح لحد الساعة 4 العصر.

شارع النبي دانيال

لو انت من هواة الكتب القديمة، يبقى يلا بينا على شارع النبي دانيال هتتمشى هناك في شارع يرجع تاريخه للقرن السادس الميلادي، ويعتبر مجمع أديان علشان فيه مسجد تاريخي للشيخ محمد دانيال الموصلي، وكنيسة المقرقسية، كمان المعبد اليهودي، والشارع مليان أكشاك للكتب القديمة، واللي اسعارها بتتراوح بتوصل في بعض الكتب لجنيهات قليلة.

قلعة قايتباي

موجودة في منطقة بحري على البحر مباشرة اتبنت مكان فنار الإسكندرية القديم اللي كان من عجائب الدنيا السبع قبل ما يتهدم، قلعة قايتباي بترجع للعصر المملوكي، وتقدر من القلعة تشوف منظر جميل للبحر من فوق، كمان بعد ما تخلص فسحتك في القلعة، ممكن تركب مركب تتفسح في بحر اسكندرية. القلعة بتكون مفتوحة من 8 الصبح لحد الساعة 5 وتذاكرها مش غاليةز

مقالات ذات صلة