مدونة
٤ موبايلات أقل من ٣٠٠٠ جنيه
النهاردة محدش يستغنى عن السمارت فون وفي نفس الوقت الأسعار غليت كتير، فلو ميزانيتك محدودة بنقدملك 4 موبايلات من ماركات مختلفة في حدود 3000 جنيه.
شاومي ريدمي نوت 7
شركة شاومي نزلت السوق المصري من فترة قصيرة لكن قدرت تنافس في سوق الأندرويد مع هواوي وسامسونج، ومن بين موديلاتها المناسبة في فئة تحت 3000 جنيه الريدمي نوت 7 وهو تليفون مناسب جدًا للتصوير لأنه بكاميرا خلفية مزدوجة (48 ميجابكسل + 5 ميجابكسل) وكاميرا أمامية 13 ميجا بيكسل، وشاشة 6.3 بوصة بدقة FHD وبطارية 4000 مللي أمبير، والمعالج سناب دراجون ثماني النواة، مع رامات 3 جيجا.
سامسونج جالاكسي J6 Plus
ناس كتير في مصر مرتبطة باسم سامسونج في تليفونات الأندرويد، فلو انت منهم بنرشحلك سامسونج جالاكسي J6+ وهو بمعالج رباعي النواة سناب دراجون، ورامات 3 جيجا، وشاشة 6 بوصة HD+، وكاميرا خلفية مزدوجة (13 ميجابكسل + 5 ميجابكسل) وكاميرا أمامية 8 ميجابيكسل، وبطارية 3300 مللي أمبير.
هواوي أونر 8c
بعد نجاح هواوي GR5 في السوق المصري كتير حبوا الماركة وكونوا ثقة فيها، ومن تليفونات هواوي المناسبة لفئة تحت 3000 جنيه هواوي أونر 8c، وهو بمعالج ثماني النواة سناب دراجون، ورامات 3 جيجا، وشاشة 6.26 بوصة HD+، وكاميرا خلفية مزدوجة (13 ميجابكسل + 2 ميجابكسل) وكاميرا أمامية 8 ميجابيكسل، وبطارية 4000 مللي أمبير.
Oppo A3S
عملاق صيني جديد بينافس بقوة في السوق المصري بأكتر من موديل، منهم في الفئة الاقتصادية اللي بنتكلم عنها نسخة A3S اللي بييجي بمعالج ثماني النواة سناب دراجون، ورامات 2 جيجا أو 3 جيجا (بتفرق في السعر طبعا)، وشاشة 6.2 بوصة HD+، وكاميرا خلفية مزدوجة (13 ميجابكسل + 2 ميجابكسل) وأمامية 8 ميجا بيكسل، وبطارية 4230 مللي أمبير.