مشاريع
عوض صليب٠٣ أبريل ٢٠١٩
This article is also available in   Switch Language

سكرك ايه؟ أحسن أماكن تشرب فيها قهوة في اسكندرية

لو انت من الناس اللي بتفتح عينيها تدور على القهوة، يبقى أكيد لما تسافر اسكندرية هتحب تعرف أكتر الأماكن المميزة اللي ممكن تشرب قهوتك فيها، وهنا بنقدملك أفضل أماكن فيها طعم اسكندرية وريحة البحر.


سوفيانوبولو



مطحن بن سوفيانوبولو من سنة 1908 وهو موجود في اسكندرية، وواحد من العلامات المميزة في شارع سعد زغلول، ولو معرفتش توصله عن طريق الخريطة ريحة البن هتدلك! ممكن تشتري من هناك نوع البن بالتحويجة اللي تحبها، وكمان عندهم قهوة خضرا، والأجمل من كده هو إنك تعدي تشرب فنجان القهوة بتاعك هناك، وسواء بتحب القهوة التركي أو الاسبرسو أو الموكا والكابتشينو هتلاقيهم موجودين.



البن البرازيلي



مش هنكون بنبالغ لو قلنا إن مخازن البن البرازيلي واحد من العلامات المميزة لاسكندرية، بعمر حوالي 90 سنة ونكهات البن المختلفة اللي بيوفرها في فروعه، قادر إنه يكون على رأس المنافسة، وكمان بيطور من نفسه فلو زرته مش هتكتفي بفنجان القهوة بس، لكن كمان ممكن تجرب الجاتوهات اللي بيعملها، وطبعا مزيج الشيكولاته والقهوة له طعم تاني.



قهوة فاروق



قهوة فاروق هتحسسك إنك ركبت آلة الزمن ونزلت سنة 1928، أول ما تدخل هيشدك التصميم المعماري للمكان مع صور صور الملك فاروق والأغاني القديمة. ميزة المكان إنه فيه روح اسكندرية القديمة وهناك هتتبسط بالقهوة التركي والشاي بالنعناع.



ديليس



مقهى ديليس واحد من الأماكن المريحة نفسيا في اسكندرية، وبرضو من الأماكن القديمة لأنه اتأسس سنة 1922، ممكن تاخد قهوتك هناك على كرسي برة المحل وتشوف البحر الناحية التانية، أو تشربها جوه مع موسيقى لطيفة وديكورات مريحة للعين. ديليس مش مجرد قهوة، لكن حلواني شاطر فهتلاقي فدايما اختيارات مغرية من الشيكولاتات والجاتوهات والمخبوزات اللي ممكن تحلي بيها جنب القهوة.

مقالات ذات صلة