أكل وشرب
أحسن أماكن تاكل فيها كوارع وممبار في القاهرة
في حب المسامط اجتمع المصريين! مش كلهم طبعا بس انت لو ليك في جو الكوارع والممبار والفشة والكرشة ولحمة الراس وخلافه، فالموضوع ده مكتوب علشانك مخصوص، ولو بتفكر تجرب فبرضو ننصحك تقرا وتشوف المكان الأنسب لمعدتك.
نقدر نقول إن السيدة زينب هي العاصمة الشعبية علشان كده طبيعي تلاقي فيها كتير من مطاعم الأكل الشعبي وحلويات اللحوم، بغض النظر إننا منعرفش ليه سموها حلويات! بس هي كده! ومن الأماكن المعروفة في السيدة زينب مسمط عباد الرحمن، ومكانه 6 شارع أطلس قصاد المدبح، وهو محل صغير لكن له شهرة كبيرة خصوصا في لحمة الراس الضاني، وكمان بيقدم فشة وكرشة ضاني وفتة باللية الضاني، ودي حاجات محتاجة معدة قوية وحد أكيّل علشان يقدر عليها.
تحت شعار “ملك المشكل” بينافس مطعم المدينة بشدة في صراع “الحلويات”، وهو برضو في السيدة زينب، ميدان لاظوغلي، وهو مميز في طريقة التقديم وشكل الأطباق مش بس الطعم، ولو قررت تجرب فاحنا بننصحك تضرب فتة كوارع مع ربع مشكل وده بيكون عبارة عن أجزاء محرمة من كبدة وسجق وكلاوي وقلب ولحمة راس ومخاصي ونخاع، وكمان اخترعوا ممبار باللحمة المفرومة، بس لا ينصح به لأصحاب المعدة الضعيفة!
بره السيدة زينب لكن مش بعيد عنها هتلاقي مسمط بجة في شارع محمد فريد في عابدين وده من الأماكن الشعبية المعروفة برضو في القاهرة، وهناك مش هتندم أبدا لو طلبت كوارع لأنه بيعملها صح قوي، وكمان عنده مشكلة لحوم حمرا لو انت ملكش في اللغوصة، أما لو بتحب التقيل فاطلب مشكل مسلوق وعيش التجربة! وطبعا المخلل جنب الأكل أساسي، ومتنساش تحبس بشاي.