مشاريع
أفضل ٥ مطاعم للعشا في اسكندرية
اختيارات العشا في اسكندرية لطيفة جدا والاختيار فيها مش سهل، ما بين المطاعم المصرية والإيطالية واللبنانية هتلاقي نفسك محتار ونفسك أجازتك تطول علشان تجرب كل يوم مطعم، هنا بنرشحلك تنويعة من أفضل المطاعم المناسبة لكل الميزانيات والمزاجات.
أول ما قالوا يا بيتزا في اسكندرية كان مطعم شي جابي الطلياني هو اللي بدأها، والمكان لطيف جدا وأول ما تدخل من الباب هتحس إنك رحت إيطاليا بسبب الديكورات والألوان والمزيكا. هناك هتلاقي تشكيلة لذيذ من البيتزا الإيطالي (إيطالي بجد) والباستا والشوربة والسلطات، وكمان المشروبات الغازية والكحولية. الأسعار هتلاقيها فوق المتوسطة لكن تستاهل علشان الجودة.
لو أول الشهر ومستعد تصرف جزء محترم من المرتب في عشوة لكن تستاهل، يبقى لازم تجرب سانتا لوتشيا، وده مطعم يوناني بديكور كلاسيكي أرستقراطي وأوقات بيكون في عزف بيانو، فهيكون مناسب جدا لعشوة رومانسية. المنيو أوروبي باختيارات مختلفة ولذيذة، وبيقدم أنواع مختلفة من المشروبات الغازية والكحولية.
لو مزاجك في ترويقة لبناني يبقى عليك وعلى تمارا بيسترو في مول ديزينيا، وهناك هتلاقي منيو كامل من المقبلات والشوربة والأطباق الرئيسية والحلو، ومن الأطباق الجديدة علينا مقلوبة السمك بالبتنجان وطاجن السمك بالكسكسي، ومن الأطباق المميزة في الحلو العثملية والكنافة النابلسية والمناقيش بالنوتيلا.
أما لو عايز تتعشى جنب البحر في المنتزه فمطعم زانيللي اختيار كويس، خصوصا إن عنده تنويع كبير في الأطباق منها الفراخ المشوية مع الجمبري، وفيليه التندرليون بالجمبري وصوص الزبدة بالليمون.
واحد من الأماكن المشهورة في اسكندرية رغم حجمها الصغير هو ألبان سويسرا في كامب شيزار، اللي شهرته جت من طاسات الجبنة اللي بيعملها، زي طاسة السجق أو اللحوم المشكلة بالجبنة، وكمان أصناف البيض والجبنة بالخلطة والتونة والرنجة.