مشاريع
فول ولا كرواسون؟ مزاج فطارك في اسكندرية عندنا
في اسكندرية اختيارات الفطار كتير ومختلفة، ما بين الفول والطعمية والكراوسون والمربى لغاية البيض الأومليت والفطار الكونتنينتال. هنا هنقولك أحلى أماكن ممكن تفطر فيها حسب مزاجك وحالة جيبك.
لو مزاجك مصري يبقى عليك وعلى فول محمد أحمد ومكانه 17 شارع شكور في محطة الرمل. المكان عبارة عن دورين والاستاف هناك ابن بلد وخدوم، وهما شغالين من سنة 1957، وأكل عندهم مشاهير كتير منهم نجيب محفوظ و فؤاد المهندس. هتلاقي عندهم كذا تحويجة للفول اختار منها اللي على مزاجك، وننصحك تجرب الجبنة المحبشة بتاعتهم وطبعا الفول ميحلاش من غير البتنجان المقلي.
لو زهقان من الفول والطعمية واخواتهم، يبقى اطلع على تريانون في واحدة من عمارات اسكندرية القديمة في ميدان سعد زغلول في محطة الرمل، وهناك هتلاقي ما تشتهي الأنفس من كراوسون وباتيه وبان كيك، وبيض أومليت بطرق كتير، وممكن تطلب فطار كونتيننتال اللي هو بيض وسوسيس وتوست وعسل ومربى وزبدة، ومتنساش قبل ما تمشي تسألهم على الشيكولاتة بتاعتهم وتجربها.
قصاد تريانون الناحية التانية هتلاقي كافيه ومطعم إمبريال وهو من الأماكن القديمة جدا في اسكندرية، وبيقدم فطار أوبن بوفيه من 8ص لغاية 12ظ والجمعة من 9ص لغاية 2ظ وهتلاقي فيه فول وطعمية وبيض وبطاطس وسوسيس وجبنة بيضا وشيدر ولانشون وكورن فليكس، غير السلطات والعيش، والحلو فيه أم علي وكب كيك وإنجلش كيك ودونات، وكمان مشروبات سخنة وعصائر.
أما لو عايز تفطر على البحر ومستعد تدفع أكتر شوية، فممكن تروح تافرنا وهناك عندهم الفطار الشرقي المعتاد (فول وطعمية وبيض) وبرضو هتلاقي اختيارات مختلفة زي الكريب والكلوب ساندوتش، وطبعا الجاتوهات والعصائر الطبيعية والميلك شيك اختيارات متاحة ومناسبة للصبح.