مشاريع
عوض صليب١٠ أبريل ٢٠١٩

أجمد ٦ مطاعم سمك في اسكندرية

لما بنقول اسكندرية على طول بنفكر في البحر والسمك، وأيا كان مزاجك في الأكلات البحرية أو حالة جيبك أكيد هتلاقي اللي يناسبك، ودي أجمد أماكن في اسكندرية مناسبة لكل الأذواق.

١. حودة جوندول


لو في آخر الشهر أو محفظتك خفيفة يبقى حودة جوندول مكان مناسب جدا تاكل فيه أكلة سمك حلوة بسعر قليل، فمثلا ممكن تاكل وجبة فيها سمك وجمبري وسبيط ورز وسلطة وشوربة بـ90 جنيه، بس اعمل حسابك الترابيزات في الشارع علشان المحل صغير.

المكان في الأزاريطة بين شارع سوتر وشارع شامبليون وشغال كل يوم ماعدا الأحد من 10 ص لغاية 10 م.



٢. عروس البحر



لو انتو عدد كبير وعايزين مكان مفتوح والخدمة فيه حلوة يبقى اطلعوا على أسماك عروس البحر جنب المرسي أبو العباس، والمكان ملحق بيه كافيتريا كبيرة علشان تحبسوا فيها بالشاي بعد الأكل، وطبعا لو في ماتش مهم ميفوتكوش.


٣. بلبع



قرية بلبع هتحل ليك مشكلة لو انتو مجموعة فيها ناس مش بتحب السمك، لأن عندهم مشويات (لحوم وفراخ) غير السمك الطازة، وليهم كذا فرع في اسكندرية في سيدي بشر وسيدي جابر ووسط البلد. بلبع برضو من الأماكن اللي أسعارها عالية لكن تجربة تستاهل.


٤. سمكمك



من الأماكن الكبيرة في اسكندرية اللي واخدة حقها في الشهرة مطعم سمكمك اللي في قصر التين في الأنفوشي. هناك هتلاقي تقريبا كل أنواع الأسماك والجمبري المعروفة في مصر، وبيعملوها بأكتر من طريقة، بس الأسعار غالية شوية، فاعمل حسابك.



٥. زفيريون



واحد من الأماكن اللي فيها ريحة اسكندرية القديمة وجمالها هو مطعم وكازينو زفيريون في أبو قير، اللي عمره 90 سنة، وله أصنافه اللي مش هتلاقيها في أماكن تانية كتير، زي شوربة المحار وطاجن لحم الترسا. المكان أسعار برضو مش رخيصة لكن التجربة تستاهل.



٦. النادي البحري اليوناني



جنب قلعة قايتباي هتلاقي النادي البحري اليوناني، وهناك المطعم له جناحين فحاول دايما تختار الناحية اليمين وانت داخل علشان المنظر بتاع المراكب في البحر حلو جدا، أما الناحية الشمال فبتطل على القلعة من بعيد، ويفضل تتصل بيهم تحجز قبلها خصوصا لو العدد كبير، وهناك هتلاقي أنواع سمك كتير وطواجن وحلويات يوناني، ومشروبات مختلفة.

مقالات ذات صلة