مدونة
٦ تطبيقات للمواصلات العامة هتسهل حركتك في القاهرة
القاهرة واحدة من أكبر مدن العالم والمواصلات فيها مش سهلة طبعا، ولحسن الحظ في الفترة الأخيرة ظهر مجموعة من التطبيقات اللي بتسهل الموضوع ده، سواء عن طريق توفير وسيلة نقل جماعي أو إنها تدلك على المواصلات.
اطلب الميكروباص وانت في البيت! تطبيق سويفل بيسهل الحركة داخل القاهرة بشكل كبير، لأنه بيشغل ميكروباصات وميني باصات مكيفة على خطوط ثابتة بمواعيد تحرك معقولة. وفي الفترة الأخيرة كمان نزل اسكندرية.
بعد فترة من تشغيل سويفل قررت شركة كريم تنافس في النقل الجماعي عن طريق تطبيق كريم باص للنقل الجماعي، ولكن واضح من الريفيوهات على البلاي ستور إن الدنيا لسه مظبتطش معاهم.
طبعا كلنا عرفنا إن أوبر اشترت كريم لكن كل أبليكيشن هيفضل شغال بشكل مستقل زي ما هو.
طبعا أوبر لقت كذا أبليكيشن بدأ يشتغل نقل جماعي فمسكتتش وعملت خطوط باص بتطلبها من نفس الأبليكيشن الأساسي، ودي حاجة كويسة لأنك مش مضطر تنزل أبليكيشن جديد، ولكن لسه الخطوط قليلة.
باصيت كان أول مشروع في القاهرة للنقل الجماعي، لكنه بدأ بأسلوب معقد شوية ومكانش ليه أبليكيشن، ولكن مؤخرا قرروا يطوروا نفسهم وعملوا أبليكيشن متوفر على جوجل بلاي وآي ستور، وظبطوا الخطوط بتاعتهم وكمان بيعملوا رحلات خاصة لإيفنتات زي ماراثون القاهرة.
دي فكرة جديدة علينا شوية، بتعتمد على مشاركة الراكب لصاحب العربية في طريقه العادي بمقابل، فلو انت صاحب عربية وبتروح شغلك كل يوم ممكن تاخد حد في طريقك بمقابل.
تطبيق وصلني مش هيوصلك أي حتة! لكنه هيعرفك تروح ازاي، فلو انت عايز تروح مكان لأول مرة ومش عارف تركب ايه، فتفتح التطبيق وتقوله مكانك فين وعايز تروح فين، وهو هيدلك على أحسن مواصلات توصلك للمكان.