حاجات منحبها
كارلوس أنيس٠١ أبريل ٢٠١٩
This article is also available in   Switch Language

أعرف أسرار أقدم أسواق القاهرة.. عالم تاني

أقدم الأسواق في العالم هتلاقيها في القاهرة، ولكل سوق أسراره والعالم بتاعه اللي مش كله بيقدر يدخله ويعرف المستخبى فيه، وأسرار أقدم أسواق القاهرة حكاية يتكتب فيها مجلدات، وفى السطور الجاية هتعرف أقدم الأسواق، هتقرى عن عالم تاني عايش جوه الزحمة.



١. سوق الصاغة



السوق ده موجود في شارع المعز لدين الله الفاطمى قرب منطقة الحسين، وده أكبر سوق لتجارة الدهب في مصر، وواحد من أقدم الأسواق اللي موجودة في الوطن العربي كله، هناك موجود كل حاجة ممكن تتخيل انها تتعمل من الذهب أو الفضة أو أى معدن، حتى الورش اللي بتعمل المشغولات هناك.



السوق كله جواهرجية، وكان مليان باليهود لدرجة أن في حارة على اسمهم اسمها حارة اليهود بالقصاصين، ده مش مجرد سوق عادي، لكن السوق ده هو اللي بيحدد أسعار الدهب المحلية، فكل اليوم التجار يتجمعوا ويتفقوا على سعر الدهب النهاردة هيبقى بكذا.



٢. سوق حمام التلات



معروف أن سوق حمام التلات في حى الجمالية أنه المكان اللي بتقصده معظم البنات اللي هيتجوزا عشان بيشتروا جهازهم منه، كل حاجة هتلاقيها هناك من الإبرة وحتى الصاروخ، السوق ده عمره أكتر من 700 سنة من أيام المماليك، ومن أسمه كان عباره عن حمامات عمومية الناس بتيجي تسترخي فيها وكانت منتشرة أيام العثمانين والمماليك، ولكن الطابع التجارى غلب على المكان وبقى واحد من أكبر الأسواق الشعبية في مصر اللى عمرك ما هتلاقيه فاضى، وهتلاقي أى حاجة انت عيزها هناك.


٣. سوق الإمام الشافعى



اتسمى بالاسم ده لأنه قريب من ضريح الإمام الشافعى اللي جنب قلعة صلاح الدين في مصر القديمة، المختلف في السوق ده أن طوله بيمتد لأكتر من 3 كيلو، وبيمر بالمقابر.. أيوة المقابر، وكل يوم جمعة التجار بيجوا يفرشوا بضعتهم على جدران المقابر وشواهد القبور، وبيبقى زحمة جدًا، وهتلاقى هناك حاجات نادرة، بالإضافة أنه بيعتبر من أشهر الأسواق لبيع الحيوانات والملابس المستعملة وحاجات تانية كتير، وكلها بأسعار رخيصة.


٤. وكالة البلح



انت مش محتاج عنوان مفصل عشان توصل لوكالة البلح، لأن الوكالة نفسها عنوان، وتعتبر من أشهر وأقدم أسواق القاهرة، وده لأن أسعارها رخيصة وبيقصدها الغني والفقير، عشان هيلاقى حاجة نضيفة بسعر كويس، واسمها وكالة البلح لأنه هى أساسًا كانت سوق لتجارة البلح اللي بيجي من المراكب اللي بتركن على شط النيل، لكن تجارة البلح تراجعت وابتدت سلع تانية كتير تدخل للسوق وخاصة مع عصر الانفتاح أيام السادات، وانتشار تجار البالة، ومن شهرة السوق اتعمل عنه مسلسل من أشهر مسلسلات السينما المصرية “لن أعيش في جلباب أبي” بطولة نور الشريف، اللي بيحكى قصة شب جه من البلد يعتمد على نفسه ويتجار فى الوكالة.



٥. سوق العتبة



أشهر أسواق القاهرة وأكثرها إزدحامًا، هتلاقيه شغال من الصبح لحد بليل متأخر، شهرته جاية من أنه في مكان وسط القاهرة وعنده محطة مترو العتبة اللي بتسهل الوصول ليه، كمان انتشار تجار الجملة خلى ناس كتير مهتمة تروحه عشان تلاقى اللي بتدور عليه.



٦. سوق الموسكى



واحد من أقدم وأشهر أسواق القاهرة ومصر كلها اللي هتلاقي فيها كل اللي انت عايزه، والمميز فيه أن متقسم لشوارع كل شارع منهم متخصص في بيع حاجة معينة ملابس حريمي وجزم وأكسسوارات وأجهزة كهربائية، كمان هتلاقى ركن للاحتيجات المنزلية والعطارة ولعب الأطفال، مش هتعرف تجيب أخره.



٧. سوق شارع عبد العزيز



وده سوق متخصص بس في بيع الأجهزة الكهربائية من أول الأجهزة المنزلية لحد الكومبيوتر والمحمول، بالإضافة لقطع الغيار والإكسسوارت، ومش مسموح أنه يتجار فيه أى حاجة تانية طبقًا للتقاليد اللي اتنشأ عليها السوق ده، لأنه بيخضع لقواعد حطها التجار الكبار القدام فيه، وهو السوق الوحيد في مصر اللي هتلاقيه مش بيبع غير الأجهزة الكهربائية.



٨. سوق خان الخليلي



ده مش مجرد سوق، ده مزار سياحي بيجيله الناس من كل حتة في العالم، موجود في قلب القاهرة الفاطمية في منطقة الحسين، أشهر من النار على العلم، مليان بمشغولات يدوية وانتيكات غاية في الروعة، معمولة بشكل يدوي وبحرفية عالية جدًا، وصنايعية المنطقة بيجلهم ناس من كل حتة في مصر عشان يخدوا منهم شغل، عشان كده لو جيت القاهرة زيارة لازم تعدى على خان الخليلي.



٩. سور الأزبكية



انت هتنزل محطة مترو العتبة، وهتطلع تلاقي نفسك وسط سور الأزبكية، أشهر سوق لبيع الكتب الجديدة والمستعملة، أى كتاب بتدور عليه هتلاقيه في السوق ده، ولو انت شخص محترف وغاوى قراية، هتلاقي فيه كتب نادرة جدًا، ممكن متلاقيها فى أى حتة غير في سور الأزبكية، لأنه مش مجرد سوق لبيع الكتب، لكن ده كتز بيضم مخطوطات وأرواق وكتب عمرها فوق ال 100 سنة، وطبعًا كله بتمنه، لكن مش هتلاقى أرخص منه لو حبيت تشترى كتاب جديد.



١٠. سوق المناصرة



تعتبر من أهم أسواق الأثاث الموجودة في القاهرة وهى قريبة من منطقة رمسيس، بيجيها الناس من كل حتة لو هما بيجهزوا فرش الشقة أو أى وحدة سكانية جديدة، وشهرة السوق بترجع لأنها بتوفر الأثاث والمفروشات بأسعار تناسب دخل الأسر المتوسطة، وكمان في مكان سهل تنقل منه اللي اشتريته مهما كان حجمه لأنك هتلاقى في السوق عربيات متخصصة في نقل الأثاث، وده بيسهل على أى حد حابب يشترى من السوق ده.

مقالات ذات صلة