مدونة
كارلوس أنيس٠١ أبريل ٢٠١٩
This article is also available in   Switch Language

أعرف حكايات أقدم كبارى القاهرة.. عمرها أكتر من ١٠٠ سنة

تطول حكايات القاهرة بطول تاريخها، ولكبارى القاهرة حكاية خاصة جدًا، منها كبارى عمرها أكتر من 100 سنة، كبارى مر عليها ملوك ورؤساء ولسه باقية وراسخة، ضاربة أساستها في عمق القاهرة، شاهدة على تاريخ وحكاوي من زمان وكان يا مكان..

١. كوبرى قصر النيل

أول كوبرى أتبنى على النيل سنة 1871م، بس كان اسمه كوبرى الخديوى إسماعيل، باعتبار أنه صاحب قرار إنشائه عشان يربط بين القاهرة والجيزة ويسهل انتقال البضايع وعملة التجارة والنقل عموما، وكلف وقتها حوالي 114 ألف جنيه، نفذته شركة فرنسية وكان بطول 406 متر وفضلوا يبنوا فيه لمدة 3 سنين، يعني عمر الكوبرى دلوقتي 148 سنة.

٢. كوبرى الجلاء

أحيانًا في ناس بتقول عليه كوبرى الدقي، الكوبرى ده كان زمان بيتقال عليه كوبرى الإنجليز أو كوبرى “بديعة” بعتبار أن جنبه كان كازينو بديعة مصابني اللي خرج منه أعظم فنانين مصر زى فريد الأطرش، ولكن بعد ثورة 1952م بقى اسمه كوبرى الجلاء، كإشارة لجلاء الإنجليز عن مصر.

يعتبر من أقصر كبارى القاهرة، قصير آه بس تاريخ، الكوبرى ده من أيام الحرب العالمية الأولى، اتبنى سنة 1914م، واتعمله تجديدات الفترة الأخيرة وعمره دلوقتي 105 سنة.

٣. كوبرى إمبابة

ده من معالم القاهرة، اتصور عنده أكتر من مشهد لكذا فيلم، واسمه برضه كوبرى “قطر الصعيد” وهو جسر حديدى بيربط بين يربط بين (حي بولاق أبو العلا وروض الفرج، بحي إمبابة بالجيزة)، موجود من سنة 1892م، عمله مهندس فرنساوى اسمه ديفيد ترامبلي في عهد الخديوي عباس حلمى التاني، عمره 127 سنة.

٤. كوبرى عباس

دلوقتي اسمه كوبرى الجيزة، الكوبرى ده أتعمل سنة 1908 عشان يربط بين القاهرة والجيزة ويعتبر الأقرب لجامعة القاهرة ومليان حكاوى مبتنتهيش، أنشأه المهندس الإنجليزي سير وليم اورل بطول 535 متر وعرض 20 متر، بتكلفة 180 ألف جنيه، عمر الكوبرى 111 سنة.

٥. كوبرى الملك الصالح

كان لازم يكون فيه كوبرى امتداد لكوبرى عباس، المهندس وليم اورل اختار منطقة منيل الروضة وعمل كوبري الملك الصالح وافتتح في نفس العام في فبراير 1908، بتكلفة 19 ألف جنيه، ولما اتفرضت الحماية البريطانية على مصر، ومع نشوب الحرب العالمية الأولى اتهد الكوبرى القديم واتعاد بناء واحد تاني في نفس المكان عشان يكون عمر الكوبرى 111 سنة.