مشاريع
كارلوس أنيس٠٣ أبريل ٢٠١٩
This article is also available in   Switch Language

١٠ أماكن تقدر تعمل فيهم عيد ميلاد في القاهرة

بيشغلنا كتير عيد ميلاد صحابنا وحبايبنا اللي أقرب، بنبقى عايزين نعملهم حاجة مختلفة تفرحهم، حاجة تليق بمكانتهم في قلوبنا، لأن أكتر حاجة هتفرحنا بجد لما نرسم ضحكة على وشهم ونحفر جوا قلوبهم ذكرى حلوة تفكرهم بينا، عشان كده بنرشحلك 10 أماكن تقدر تعمل فيهم عيد ميلاد في القاهرة وتفاجئ حبيابك، وكل سنة وهما حوليكم وفرحنين بوجودهم.



١. Pizza Club



هتحس أنك داخل نادي فعلاً، المكان في مصر الجديدة، مفيش حد جربه ومشكرش في الأكل بتاعهم أو حتى الخدمة عندهم، تقدر تعمل هناك عيد ميلاد حبايبك وتفجأهم؛ لأن تيم المكان كله هيحاول يخرج عيد الميلاد معاك بأجمل صورة عشان يبقى عيد ميلاد ميتنسيش، المكان مفهوش منيمم تشارج أو حتى ضريبة خدمة، تقدر تكلمهم وتستفسر منهم عن الحجز.



٢. Makank Cafe & Restaurant



زى ما بيقولوا على نفسهم “قنبلة أعياد ميلاد”، المكان ده سر شهرته أنه مناسب جدًا لأعياد الميلاد خاصة لو معاك عدد، بيوفر أماكن تصل لـ 20 فرد، عندهم المنيمم في حدود 100 جنيه، والدي جي والزينة المكان بيقدمهولك مجانًا، والناس بتحاسب بالأسعار اللي موجودة في القايمة، كلمهم وأحجز عشان تلم صحابك وتفرحوا صاحب عيد الميلاد.



٣. Talla Restaurants



بيقدم المكان الخدمة والدي جي مجانًا لأصحاب عيد الميلاد، ومناسب كمان لو معاك عدد وعايز تعمل مفاجأة كبيرة وحلوة، عندهم عروض كتير بتناسب أى ميزانية، ويفضل تحجوز قبلها بيوم عشان يقوموا معاكم بالواجب.



٤. Mezaj Cafe and Restaurant



القعدة هناك مزاج وفصلان وروقان، أما بنسبة لأعياد الميلاد فالمكان تحفة، حاجة كده للمزاج المخصوص، قعدة على نيل كورنيش المعادي، وفيه قعدة عربي ودي جي وزينة، فيه خدمة على التورتة في حدود 75 جنيه، ومنيم للفرد 100 جنيه يشمل الأكل أو الشيشة، ومتاح أنك تجيب عدد معاك بس لازم تحجز قبلها بيوم على الأقل، المكان ده حلو لو كنت في محيط حلوان والمعادي.



٥. Bardora



اختيار مميز لو حابب تعمل عيد ميلاد حبايبك وصحابك وتفجأهم وفي نفس الوقت تلاقي خدمة كويسة وأكل جميل، المكان كله ألوان مبهجة وحاجة تفتح النفس، حتى الديكورات هناك تحفة وحاجة Art خالص عشان صور عيد الميلاد تطلع جامدة وتبقى ذكرى جميلة للعمر، الأسعار عندهم حلوة ومفيش منيمم، هتلاقيهم في مدينة نصر، كلمهم واحجز لحفلة عيد ميلاد كلها تضحك ورقص.



٦. CAVE – Play Station



بص بقى المكان ده حاجة مخصوص كده ليك انت وصحابك، عشان تحتفلوا مع بعض بعيد الميلاد وبعدها تنزلوا تقطعوا بعض ماتشين بلايستيشن كده، فكرة المكان مختلفة عن أى حتة روحتها، هو عبارة عن أربع غرف اختار منها اللي ينسبك وظبطها على مزاجك عشان عيد الميلاد وفيه movie night عشان السهرة تحلو، ده بالإضافة أن الخصوصية حاجة أساسية في المكان ده، عشان تبقى على رحتك انت وصحابك.



٧. Al-Markeb



منسناش طبعًا الناس اللي عايزة تحتفل بعيد ميلاد حبيبها أو خطيبته أو مراته، الحاجات البرايفت واللحظات الرومانسية الهادية البعيدة عن دوشة الناس والصحاب، المكان ده مناسب جدًا للكابلز وبيقدم عروض حلوة جدًا، في كمان يا سيدي عشان تسمع عزف رومانسي هادئ انت وحبيبك، وبيقدم عروض خاصة على أعياد الميلاد كل فترة، تقدر تكلمهم تستفسر عن اللي انت عايزه الناس شيك جدًا وتعملهم غاية في الرقي والاحترام.



٨. Le Mix



قعدة على النيل عند كورنيش المنيل، ديه حاجة للناس القريبة من قلبك، قعدة رومانسية وهادية بالذات وقت الغروب، المكان حلو جدًا لأعياد الميلاد وبيعمل أوفرز كتير عشان تناسب احتياجات أى حد نفسه يقعد قعدة رايقة على النيل ويستمتع بعيد ميلاد حبيبه، ولو جى ومعاك صحبة فالمكان بيقدم عروض لو العدد أكتر من 10 أشخاص زى أن التورتة بالسيرفيس free، ولو أقل من 10 أفراد بيعملك خصم 50%، متفوتش الفرصة وروح أعمل عيد ميلاد حبيبك اللي جى هناك.



٩. Stage ستيدج


المكان ده مجنون، معروف بأنه من أفضل الأماكن اللي ممكن تعمل فيها عيد ميلاد في القاهرة، هتلاقي ستيدج ومايك عشان تطلع النشاذ اللي جواك في عيد ميلاد صحابك وتقول كل اللي نفسك فيه ليهم بس في المايك بقى عشان كله يسمع، المكان بيساعد جدًا لو العدد كبير، وديكوراته مبهرة عشان الصورة تطلع حلوة، وفيه غرف عشان خصوصيتك انت وصحابك وتبقوا على راحتكم وبيقدم عروض وفقرات حلوة جدًا يليق بعيد ميلاد ميتنسيش.



١٠. Adrenalin Park, Egypt



مينفعش يكون موضوعنا عن أماكن مميزة تحتفل فيها بأعياد الميلاد ومنقولش على المكان ده، أدرينالين بارك من أكتر الأماكن اللي ممكن تستمع فيها باللعب والاحتفال بأعياد الميلاد سواء كان للبالغين أو حتى للأطفال اللي بيحبوا يضربوا بعض بالألوان أو يدورا على الكنز مع صحابهم، في عروض أعياد ميلاد مخصوصة للأطفال، ولو انت كبير بس لسه الشقاوة جواك احتفل بعيد ميلاد صاحبك هناك واضربه بالألوان وشوف مين هيكسب.

مقالات ذات صلة