تعرف على أول ٣ أفلام خيال علمي في السينما المصرية

السينما المصرية سينما متنوعة، فيها الرعب والكوميدي والتراجيدي والجريمة والفيلم الغنائي والاستعراضي وكمان أفلام الخيال العلمي، مش مصدقني؟! طب تعالي أقولك على 3 أفلام مصرية كانت سبب في تواجد أفلام الخيال العلمي في مصر.

١. السبع أفندي

سنة ١٩٥١ مع مدير التصوير والمخرج أحمد خورشيد لما قدم فيلم “السبع أفندي” اللي كتبه على الزرقاني وكان بطولة سعيد أبو بكر وشادية وفريد شوقي وسراج منير، ويمكن ده الفيلم الوحيد اللي كان بطولة سعيد أبو بكرة.

الفيلم قصته بتدور حوالين سكر عبود الموظف البسيط المضطهد من كل اللي حواليه مديره في الشغل وابن عم البنت اللي بيحبها، لحد ما بينام في يوم ويصحى يلاقي نفسه عنده قوة خارقة وبيقرر الانتقام من الكل بشكل كوميدي لطيف.

٢. رحلة إلى القمر

سنة ١٩٥٩ قدم المخرج حمادة عبد الوهاب (هو اسمه حمادة فعلا) فيلم رحلة للقمر من تأليفه وبطوله رشدي أباظة وإسماعيل يس وصفية ثروت.

والحكاية بتدور حوالين 3 رجاله بيقرووا من نفسهم يطلعوا رحلة للقمر – كأنهم طالعين راس البر كدة- وفعلا بينجحوا ويوصلوا القمر وهناك بيلاقوا واحد عايش هو وبنته وانسان ألي وبيحب واحد منهم بنت الراجل ده لكن الانسان الألي بيرفض وبيدخل معاه في صراع.

٣. هـ3

هو اسمه كدة فعلا (هاء ٣) فيلم للمخرج عباس كامل وتأليفه بالاشتراك مع صلاح إبراهيم، وأنتج سنة ١٩٦١، وبطولة رشدي أباظة وسعاد حسني وماهر العطار وطروب وتوفيق الدقن.

وبيدور حوالين راجل عجوز رافض يعترف بسنه وبيتعرف على عالم بيخترع عقار بيسميه هـ3، العقار ده بيخلي العجوز شباب تاني، وبيرجع الراجل العجوز علشان يرتكب جريمة قتل ويحاول يتجوز خطيبة ابنه، لكنه بيفوق ويرجع عجوز تاني.

الأفلام التلاتة دول رغم أنهم بينتموا للسينما الكوميدية لكنهم فتحوا الباب لتواجد النوع ده من السينما في مصر، أه مش بكثافة كبيرة لكن موجودة فهتلاقي أفلام جادة أتعملت بعد كدة زي (قاهر الزمن) لكمال الشيخ و(الرقص مع الشيطان) لنادر شريف وغيرها.