مشاريع
٤ أماكن للطفل والأسرة في القاهرة
لو بتفكر في فسحة لأطفالك وفي نفس الوقت الأسرة كلها تستمع معاهم، بعيد عن خروجات المولات اللي فيها أكل كتير ومشتريات أكتر، يبقى خليك مع الأماكن المتخصصة للأطفال، ودي لحسن الحظ موجودة كتير في القاهرة وبأسعار معقولة.
القرية الفرعونية
هترجع بالزمن لعصر الفراعنة وممكن تخرج من هناك بصور كمان تثبت إنك فرعون مصري حقيقي، وولادك هيتبسطوا برحلة المركب وزيارة المتاحف زي متحف النوبة ومتحف المخترعين والحياة اليومية للفراعنة، وكمان ممكن تلعبوا لعبة الهروب من المقبرة، أو تدخول سينما 9D أو تلعبوا في الملاهي، ولو جعتوا هتتغدوا في مطعم الملك توت.
القرية مفتوحة يوميا من ٩ ص إلى ٥ مساءً في الشتا، ولغاية ٧ م في الصيف، وسعر التذكرة بيختلف حسب الأنشطة اللي بتحجزها.
حديقة الأسرة
من أحدث الأماكن في القاهرة المناسبة للأسرة والطفل، على طريق القاهرة السويس (مدخل الرحاب2) وهي مش بس حديقة لكن مركز ترفيهي متكامل، ففيها مراكز ثقافية ومسارح وسينما ثلاثية الأبعاد، ومطاعم مختلفة، وبحيرة صناعية، وحديقة حيوان، وملاهي وملاعب مفتوحة.
الحديقة مفتوحة يوميًا من ٩ ص إلى 10م، وسعر التذكرة ٤٠ جنيه في أيام الأسبوع و50 في الجمعة والسبت شامل حديقة الحيوان والمتحف المفتوح والألعاب الثابتة. أما باقي الأنشطة فليها تذاكر منفصلة.
فجنون فلاح
فجنون (فن+جنون) من الأماكن اللي الأطفال ممكن ينطلقوا فيها بحرية، ويجربوا الحياة الريفية من الزراعة واللعب مع الحيوانات الأليفة، وكمان ممكن يجربوا يعملوا الطوب اللبن بنفسهم أو يلعبوا بالألوان والصلصال. المكان في المريوطية (الجيزة) مفتوح من 9ص إلى 5م في الشتا ولغاية 6م في الصيف وسعر التذكرة ٤٠ جنيه.
الاختيار الكلاسيكي للحدائق بيفضل دايما مهم، خصوصا في الربيع علشان حديقة الأورمان بتعمل معرض زهور الربيع من 21 مارس لغاية 3 مايو، وهناك بتلاقي كل أنواع الزهور والنباتات اللي ممكن تتخيلها، والمعروضة مش بس للفرجة لكن للبيع كمان بأسعار كويسة. الحديقة في الجيزة قصاد جنينة الحيوانات ومفتوحة يوميا من ٩ ص إلى ٤ م.