مشاريع
شرين منصور

٥ حاجات لازم تجربها على كوبرى قصر النيل

واحدة من أشهر علامات القاهرة، هى كوبرى قصر النيل وأسدين كوبرى قصر النيل، وواحد من أكتر الأماكن اللي بتحب الناس تروحها في أى وقت، وعشان كده مينفعش تكون عديت من عليه من غير ما تكون جربت الخمس حاجات ديه.

١. الدرة المشوى

على أول الكوبرى وعند أخره هتلاقى عربيات الدرة المشوى، وريحته اللي بتهل عليك أول ما توصل نحية النيل، هتلاقى ديمًا رجالة واقفة بعربيات وبتشوى درة على الفحم، وكمان بيدولك إمكانية إنك تختار الكوز اللي هتحب تشويه لو مش حابب تاخد من الجاهز، تاخد الكوز بتاعك وتنقنق فيه وانت مستمتع بجمال القاهرة من على النيل.

٢. حمص الشام

مينفعش تبقى الدنيا شتا وانت على كوبرى قصر النيل ومتجربش “الحلبسة” حمص الشام، هتلاقى عربيات حمص الشام حوليك في كل حتة، الكوباية تبقى خارجة من القدرة سخنة وتدفى، وشوية شطة على لمونة تمزج كوباية الحمص، وتسمع الأغاني اللي بتجيلك من كل حته حواليك، وانت في حالة من الروقان والسرحان على شط النيل اللي هواه الساقع يلطشك ويصحى جواك ذكريات اللي عدى واللي فات.

٣. الحنطور

أول ما توصل هتشم ريحة الأحصنة بسبب عربيات الحنطور الكتير اللي هتلاقيها عند الكوبرى، هتركب الحنطور وتلف بيه على النيل وتسمع الأغاني اللي على كيفك، ووممكن كمان تركبه بعد ما تشترى كوز الدرة عشان المتعة تبقى أكتر، ولو صاحب الحنطور حبك، ممكن يخليك تسوقه، متخليش التجربة تفوتك.

٤. تسوق عجل

في الفترة الأخيرة ابتدت تتنظم فاعليات ومارثونات لسواقة العجل على كوبرى قصر النيل، بتبقى الصبح بدرى والدنيا فاضية والهوا لسه رايق ونضيف، هتروح تاخد العجلة وتنطلق على الكوبرى والنيل جنبك، هتحس إنك طاير، ويمكن تدمن الموضوع وهتحب ديمًا تسوق العجلة من فوق كوبرى قصر النيل.

٥. تتصور مع الأسدين

في طقوس كده لازم لما تروح أى مكان تعملها، ومن طقوس كوبرى قصر النيل أنك تاخد صورة مع الأسدين، علامة من علامات القاهرة، وبتجيله ناس من كل حتة في مصر والعالم عشان تتصور عنده، متنساش تاخد صورة مع حبايبك، وتعمل ذكريات حلوة تعيش لسنين قدام.