أكل وشرب
عمرو شاهين٠٨ أبريل ٢٠٢١
This article is also available in   Switch Language

السريديا واللوجز والصرمباء.. أكلات السويس الشعبية

ما هو البحر فيه سمك وجمبري وكابوريا واستاكوزا ومحار، والأخير ده بقي لعبة السوايسة واكلاتهم المشهورة، في السويس تحديدا ها تسمع أسماء زي سريديا لوجز أو صرمباء، ما تستغربش دي واحدة من أشهر وأجمل الأكلات السويسية المشهورة، واللي مش ها تلاقيها غير في السويس.



السريديا



السريديا هي نوع من أنواع المحار، لكن علشان تجيبه محتاج تكون غطاس، تنزل بنضارة بحر، وتغطس تجيب واحدة وتحطها فش شوال معاك، وتنزل تجيب غيرها، عملية صيد السريديا عملية مرهقة جدا، لانها بتم يدويا زيها زي أغلب عمليات صيد المحار، لا صنارة ولا شبك، والمية تكدّب الغطاس. السريديا بعد ما تتجمع بتتسلق وهي في صدفتها وبعد ما تتسلق تتفتح وتتقدم في اطباق بعد ما يترش عليها البهارات والملح والليمون، وجنبها طبق طحينة محترم، وألف هنا وشفا.



اللوجز





برضو نوع من أنواع القواقع في البحر الأحمر، وبيتم صيده بنفس الطريقة، وبعدين إما تسلقه في صدفته أو تكسر الصدفة وتخرج اللحم منها، وبعدين بيتاكل مسلوق أو ممكن مشوي على الفحم او الجريل، أو يدخل ضمن مكونات شوربة السي فود، أو يتشوح بشوية توم بيكون حكاية.



الصرمباء




بتتباع بالواحدة وبتتباع ناشفة او طرية، انت اكيد شوفت الصدفة بتاعتها في أماكن كتير، حصوصا أن في ناس كتير بتستخدم الصدفة بتاعتها كطفاية سجاير، الصرمباء، ليها طريقة في أنك تخرج اللحم من الصدفة من غير ما تكسرها، وتتسلق وتتقطع شرايح وتتاكل زيها زي السريديا، أو تتنشف في الشمس وتتباع ناشفة وتتاكل زي ما هي كدة، أختراع يا كوتش.



عموما السريديا واللوجز والصرمباء والجلاجولا والأقماع وبلح البحر كل دي اكلات يعرفوها السوايسة كويس وفي منها ها تلاقيه في اسكندرية وبورسعيد وجنوب سيناء، لكن السويس هي رقم واحد، في بلد الغريب الأكلات دي أكله شعبية درجة أولى، نصيحة لو عديت على السويس لازم تجربها.

مقالات ذات صلة