مشاريع
خمس خروجات على أد الإيد في القاهرة
عشان تخرج دلوقتي لازم تبقى محصن محفظتك بمبلغ كبير لأنك هتتحرج برة خصوصا لو معاك أولاد وعيلة يعني، فمنعا للإحراج وحبا في الانبساط قررنا نقولك على خمس خروجات مش لازملها فلوس كتير وبردو هتبسطك يعني متقلقش.
1- الأتوبيس النهري
بستغرب لما بلاقي حد أهله مودهوش وهو صغير رحلة بالأتوبيس النهري لأن ده الحاجة الوحيدة اللي لسه محافظة على هيبتها في النيل، لا هتلاقيهم مشغلين مهرجانات بقى ولا أغاني حزايني فتكئبكوا وأنتوا أسرة سعيدة رايحة تتفسح عادي في النيل.
فخدوا ولادكوا وعلى ماسبيرو لأن من ضمن المحطات بتاعته مرسى قدام مبنى ماسبيرو والتذكرة مش هتبقى أكتر من خمسة جنيه.
2- الجناين
القاهرة مليانة بالجناين الجميلة والرخيصة في نفس الوقت، زي حديقة المريلاند في مصر الجديدة عندك خمسين فدان هيمرحوا فيهم الأولاد براحتهم والتذكرة ب 25 جنيه، وفيه الأرخص منها حديقة الأورمان في الجيزة قدام جامعة القاهرة لأن تذكرتها مش هتتعدى الخمسة جنيه، وممكن جدا تروحوا جنينة الأورمان وحديقة الحيوان في خروجة واحدة لأنهم جنب بعض. فيه كمان حديقة سفاري لو أنت نفسك تروح الريف لأن جوها هيفكرك بالريف، بس موجودة في أرض مطار إمبابة تحت الدائري والتذكرة ب15 جنيه. لو عايزين تنعموا بالهدوء فحديقة جزيرة المعادي هي أحسن مكان بيجمع ما بين النيل والأشجار الكتير، تذكرتها في الأيام العادية بيختلف عن الويك إند فيستحسن تروحوها في الأيام العادية.
3- رحلة القناطر
من أجمل الرحلات اللي ممكن تروحها عشان القناطر الخيرية مليانة بالجناين الكتيرة مش بس كده لأ عادة بتبقى فاضية خصوصا لو رحتها في يوم عادي مش عيد أو مناسبة قومية، فتقدر تركب فيها خيل وسط النباتات والشجر أو تأجر عجلة وتستمتع بيها وسط الطبيعة، ده غير كمان إن فيه هناك شاليهات بتتأجر بتطل عالنيل وفيها جنينة بتبقى مجهزة بالشواية بتاعتها فممكن تاخد معاك أي حاجة بتتشوي وتعمل أحلى حفلة شوي عالنيل.
4- برج القاهرة
هي خروجة بتبسط كل الأعمار لأن منظر القاهرة من فوق البرج بيبقى مبهج جدا، القاهرة دايما من بعيد بتبقى أحلى وهتشوف كل المعالم المهمة من فوق، لو معاك ولادك أقل من 6 سنين فهيدخلوا ببلاش، أما المصريين فتذكرتهم ب25 جنيه.
5- قلعة صلاح الدين الأيوبي
التذكرة للطلبة ب 10 جنيه، ولغير الطلبة ب20، القلعة مش بس هتبص منها على القاهرة من فوق، لأ ده فيها متاحف حربية وزنازين القلعة المشهورة وكمان صور لريا وسكينة وقصتهم.