مدونة
كارلوس أنيس٢٨ سبتمبر ٢٠٢٠
This article is also available in   Switch Language

أعرف حقيقية أشهر ٥ آكلات شعبية مصرية

لكل بلد في العالم أكلات شعبية مشهورة بيها، ويمكن كمان بعض الآكلات ديه تبقى حلوة لدرجة أنها تغزوا بلاد العالم، زى السوشي مثلاً أو العيش الفرنساوى أو الجبنة التركي، وفي الكام سطر دول هنتكلم عن أشهر أكلات شعبية مصرية، وهنقول أصل وحقيقة كل أكلة شعبية مصرية.


١ . الفول المدمس



المصريين معروفين بالفول والفلافل، علامة من علامات الأكلات الشعبية المصرية، أصل الفول في مصر له أكتر من حكاية ورواية، منها إنه كان أكلة للفراعنة، وفي حكاية بتقول أن الموضوع بدأ من عند راجل يوناني اسمه “ديموس” عاش في مصر القديمة، وكان عنده حمام عمومي بيجمع الفضلات والقمامة ويحرقها عشان يسخن الميه، بس حب يستفاد من الحرارة اللي خارجة من الفرن بشكل أكبر، فقام جاب شوية فول في الميه وحطهم في النار، وخرجت أشهر اكلة للشعب المصرى، وبقى اسمها فول مدمس نسبة لعمنا ديموس اليوناني.



٢ . الفلافل (طعمية)



معروفة أن الفول والفلافل أو “الفول والطعمية” توائم ميفترقوش أبدًا، في خلاف بين الشوام والمصريين على أصل الأكلة، لكن بما أن مصري اللي كاتب فطبيعي هقول أن الأكلة أصلها مصري، الحكاية المصرية بتقول أن الأقباط هما اللي ابتكروا الطعمية أو الفلافل وده لأنهم بيصوموا معظم أيام السنة، فكانت الطعمية بنسبالهم بديل للحمة، وطبعًا الأكلة دخل عليها افتكاسات كتير في وقتنا الحالي، بقت بالسمسم وعين كتكوت سعتك.



٣ . الكشري



القاهرة تحديدًا هى المعقل الأول والأكبر لمحالات الكشري في مصر، والكشري يعتبر واحد من أشهر الأكلات في مصر، والأجانب بيجوا يطلبوها بالاسم، بس اللطيف بقى أن الكشري مش أكلة مصرية في الأساس، ديه أكلة هندي دخلت مصر مع الحرب العالمية الأولى، واسمها في الهند “كوتشري”، بس المصريين حطوا التاتش بتعهم وبقى اسمها “كشري”، وبقى أشهر من الهندي، وكمان في مصادر بتقول أن الكشري ده كان أصله فرعوني واسمه “كشير” ومعناه طعام الآلهة.


٤ . الملوخية



أساس الملوخية الشهقة معروفة، لكن أيه حكاية الملوخية وشهقتها، بيقولك بقى يا سيدي أن الملوخية ديه كان اساسًا اسمها “الملوكية”بعتبار أنها أكلة الملوك فقط، وفي حكاية بتقولك أن الهكسوس أجبروا المصريين يكلوها من باب أن فيها سم، بس لا طلع فيها سم ولا حاجة والمصريين القدماء حبوها جدًا، في قصة لطيفة برضه أن المعز لدين الله الفاطمي جاله مغص فالأطباء قالوله كل ملوخية فالمغص راق والملك حب الأكلة، بس الأطباء عرفوها منين يا ترى؟

أما موضوع الشهقة ده مرتبط بالخوف، حكاية بتقولك أن واحدة كانت الملخية هتدلق عليها وهى بتحط التقلية قامت شهقت من الخوف، والتاني طباخ كان الملك هيقتله لو مخلصش الأكل بسرعة، الحارس دخل عليه المطبخ أتخض فشهق وهو بيعمل الملوخية، فقامت عجبت الملك، وبقى الطباخ يشهق على الملوخية وتناقلت العادة المرعبة الأسرة المصرية، هما يشهقوا في المطبخ واحنا نتسرع.


٥ . المحشي



أصلها تركي بالمناسبة ودخلت مصر خلال الحكم العثماني، بس خد بالك المحشي المصري لا يعلى عليه، يعني متعليش على المحشي المصري عشان ده التوب، مفيش بلد في العالم بتعمل محشى زى اللي بيعمله المصريين، ومفيش محشي بيتخن زى المحشي اللي بيعمله المصريين برضه.

مقالات ذات صلة