مدونة
إجراءات المطاعم في القاهرة للوقاية من الكورونا
في وسط الخوف العالمي من أخبار انتشار مرض الكورونا الدولة المصرية بدأت في اتخاذ الإجراءات الاحترازية للوقاية من المرض و في مطاعم كتير في القاهرة اخدت إجراءات وقائية عشان تساعد في نشر الوعي وحماية زبائنها.
هنقوللكم أهم المطاعم دي وإيه الإجراءات اللي اتخذوها:
– دسوقي أند صودا:
مطعم دسوقي أند صودا اللي ليه كذا فرع في القاهرة أعلن إنه هياخد إجراءات احترازية، منها إنه هيوقف استخدام أي أدوات طعام استخدامها بيكون أكتر من مرة وهيعتمدوا على البلاستيك والكارتون، كمان حط هاند چيل ومطهرات في كل مكان، وهيعملوا كشف دوري على كل عمالهم، زيادة انهم وفروا خدمة توصيل منزلي.
– شقة جاردن سيتي:
شقة جاردن سيتي الموجودة في وسط البد وهي مطعم و co working space قررت قرارات مشابهة في الأدوات المستخدمة ووجود ماكينات تطهير، زيادة انهم لغوا أي events من اللي بيعملوها في المكان لوسط إبريل، وطلبوا من الناس يبطلوا البوس والأحضان.
– مطعم أيادينا:
المطعم نزل قرار إن اللي بيترددوا عليه هم دايما عيلته، فهياخد كل الاجراءات الاحترازية من تطهير لعماله وللمكان، وهيحرص ان أي حد يروح يستخدم مطهرات، كمان أكد إن لو أي حد حس إن الأمن إنه يكون موجود في البيت فهم هيوفروله الأكل لحد عنده بخدمة الديليڤري وكمان أكدوا على نظافة الأكل اللي هيروح.
-The Bakery Shop:
قرروا شوية قرارات زيادة عشان يتبعوا قرارات التقليل من احتكاك الأشخاص، منها إنهم قللوا مواعيد عمل الفروع، شالوا كل الأماكن المغلقة للناس، لغوا وجود التابلت اللي الناس بتكتب فيه تقييمهم، اكدوا ان الناس تستخدم المطهرات الموجودة عالباب وتتبع ارشادات الدخول عشان يأكدوا عدم وجود أشخاص كتير في المكان في نفس الوقت.
– البرنس:
أما البرنس فهو أكتر مكان الناس اتكلمت عن قرار صاحبه ناصر البرنس وهو التبرع بمليون جنيه لوزارة الصحة المصرية للوقاية من الفيروس، زائد إنه قفل المحل لمدة 16 يوم.