مشاريع
شروق مجدي٠٥ فبراير ٢٠٢٠
This article is also available in   Switch Language

متاحف أدباء تقدر تزورها في القاهرة

في العالم كله في اهتمام دايمًا ببيوت الأدباء والشعراء، وغالبًا بتتحول لمتاحف عشان توثق لحياتهم وأدبهم والنماذج على ده موجودة في كل مكان في العالم.


نجيب محفوظ:



قريب افتتحنا متحف لواحد من أعظم الأدباء في مصر، متحف “نجيب محفوظ”، المتحف موجود في منطقة الأزهر وتحديدًا في تكية أبو الدهب قدام الجامع الأزهر وده قريب من البيت اللي اتولد فيه نجيب محفوظ، وهناك كان بيقعد في وقت الكتابة.

المتحف موجود فيه غير الصور الجوايز كتير من مقتنيات نجيب محفوظ من أول نضاراته وساعاته لغاية أدوات الحلاقة.. في كل غرفة من غرف المتحف هتلاقي مجموعة عظيمة من المقتنيات بجانب أفلام بتتعرض داخل المتحف عن نجيب أو ليه، زي الفيلم اللي موجود في غرفة الحارة اللي من خلاله بيحكي نجيب عن علاقته بالحارة في مصر وإزاي تعايش معاها وليه كتب عنها.



طه حسين:



متحف طه حسين أو “رامتان”، اللي موجود في شارع طه حسين بالعمرانية في الجيزة، أصلًا كان الفيلا اللي عاش فيها الأديب.. هناك هتلاقي مكتبته ومكتبه.. وطول فترة تجولك هتسمع موسيقى كلاسيكية زي اللي كان بيسمعها وهو بيكتب.

هناك كمان هتلاقي صالون الأحد، اللي كان بيعمل فيه الأديب طه حسين ندوته الأسبوعية كل يوم حد، وبجانب مقتنياته وغرف منزله ومكتبته وكل جوايزه اللي حصل عليها، هتلاقي كمان قطعة من كسوة الكعبة اللي أهداها ليه ملك السعودية الأسبق فهد عبد العزيز.



أحمد شوقي:


على كورنيش النيل في الجيزة في شارع أحمد شوقي المتفرع من شارع مراد، هتلاقي متحف أحمد شوقي، أمير الشعراء المصري، واللي كان بيته بعد ما رجع من منفاه وترك بيته في المطرية، وهناك هترجع بالزمن 100 سنة وتشوف كتير من مقتنيات أحمد شوقي ده غير كتبه ومسوداته.

في المدخل هتلاقي تمثال ليه، وفي إيده اليمين وردة لاستقبال الزوار، كمان دايمًا هناك بيبقى فيه ندوات أدبية وشعرية، وكمان فيه مكتبة صوتية لموسيقى عبد الوهاب

مقالات ذات صلة