ترشيحات لأحسن 6 روايات مترجمة ممكن تجيبها من معرض الكتاب

لما نزلنا معرض القاهرة الدولي للكتاب 2020 لقيناه مليان بالكتب المختلفة اللي تهم جميع الأذواق والاهتمامات ودي حاجة في حد ذاتها لطيفة جدا، واللي شد انتباهنا أكتر هو العدد الكبير من مقتنيات الأدب المترجم اللي ممكن تجيبها من المعرض لما تنزل، وعشان كده هنرشحلك 6 كتب في الأدب العالمي ومترجمة من اللي نازلين المعرض السنادي.

١. رسائل من مصر- ليدي دوف جوردون

الليدي دوف جوردون كانت أديبة بريطانية جت مصر عشان تتعالج من السُل عام 1862، فكانت بتكتب رسايل عن الحياة المصرية والست المصرية، وحاجات كتير جدا بسيطة في محتواها لكن بتشكل صورة مصر من زاوية مختلفة عننا تماما، من زاوية الليدي دوف جوردون.

ترجم كتاب الرسايل الروائي إبراهيم عبد المجيد وهتلاقوه موجود في دار بيت الياسمين للنشر في صالة 2، داخل جناح سي 29.

٢. حلم نوفيلا- أرتور شنيتسلر

رواية حلم للكاتب النمساوي أرتور شنيتسلر، وهي رواية ترجمها سمير جريس لأول مرة من الألمانية مباشرةً، وبتدور القصة عن زوجين في بداية القرن العشرين، وازاي هيقدروا يتعايشوا مع بعض بعد ما كل واحد فيهم يقول سر صغير للتاني!

رواية حلم موجودة في دار الكرمة في صالة 2، جناح بي 18 داخل معرض الكتاب.

٣. الناقوس الزجاجي- سيلفيا بلاث

حياة الشاعرة والأديبة سيلفيا بلاث كانت مأساوية زي موتها المأساوي بالظبط، وسيلفيا كتبت كل اللي كانت بتعانيه بس بطريقة مستعارة في رواية “الناقوس الزجاجي”، عشان كده هي رواية مؤثرة جدًا وتعتبر من أهم كتابات سيلفيا خصوصًا لو حد من القراء عايز يتعرف على الأديبة وعلى معاناتها بشكل أوضح.

رواية الناقوس الزجاجي، ترجمتها ميسرة صلاح الدين للعربية عشان تلاقيها بسهولة في معرض الكتاب 2020 عن دار بيت الياسمين للنشر في صالة 2، داخل جناح سي 29.

٤. مختارات من قصص ستيفنسُن

لمحبي القصص القصيرة العالمية هتلاقوا شغفكم كله جوه كتاب مجمع كتير من القصص القصيرة اللي كتبهالنا الكاتب روبرت ستيفنسُن، وترجمها لينا محمود مسعود وتقدروا تشتروها من بيت الياسمين في صالة 2، في جناح سي29.

٥. السيدة دالواي- فيرجينيا وولف

ترجمت لينا بسمة ناجي واحدة من أهم 100 رواية في القرن العشرين، وهي رواية السيدة دالواي للكاتبة فيرجينيا وولف، واللي مينفعش تفوتوها ضمن ليستة الكتب اللي هتجيبوها من المعرض السنادي.

هتلاقوها في دار نشر بيت الياسمين صالة 2، جناح سي 29.

٦. حزن غير محتمل- بيتر هاندكه

بيتر هاندكه الروائي النمساوي الحاصل على نوبل للآداب لعام 2019، كتب رواية حزن غير محتمل كنعي أدبي لأمه المتوفية وسرد فيها أجزاء من سيرة حياتها.

الرواية موجودة في دار العربي للنشر صالة 2، جناح أ 13.