مشاريع
نهى قنديل١٠ يناير ٢٠٢٠
This article is also available in   Switch Language

٥ أماكن في القاهرة لممارسة اليوغا

سواء كنت من محبي اليوغا او لا, جربت التأمل قبل كدة او مش مقتنع, اعرف الاماكن دي يمكن تحتاج تفصل فى يوم من الأيام..



مودرا يوجا ستوديو



اول متدخل مودرا هتحس انك دخلت عالم تانى؛ عالم مريح, هادي, اضاءة خفيفة, قعدات على الأرض شبيهة بالقعدة العربي. الأختلاف ده ممكن يخضك فى الاول بالذات ان انت هتبقى لسة طالع من اكتر الشوارع الحيوية فى الزمالك, بس هى خمس دقايق و هتاخد على الجو على طول. مودرا بتقدم مجموعة متنوعة من ورش و دروس فى اليوجا و التأمل , و من اكتر الدروس الشهرية اللي عليها اقبال فى مودرا هو التأمل الصوفي, اللي مش موجود فى اماكن كتير.



اون ذا مات ستوديو



ستوديو اون ذا مات من الأماكن المتخصصة فى اليوجا. مكان واسع و مريح نفسياً , بيقدم اختيارات مختلفة. من اشتراك لمدة شهرين, دروس جماعية, و دروس خاصة للي بيرتاح اكتر لوحده او محتاج تركيز اكتر. اون ذا مات فيه دروس يوجا هوائية و كورسات مكثفة و مفصلة للي حابب يتعلم اكتر عن اليوجا.



روحانة يوجا ستوديو



روحانة من الأماكن القليلة اللي بتقدم يوجا مخصصة للأطفال ده غير طبعاً الدروس والورش المعتادة للكبار بجميع مستوياتها. و روحانة ليها مكان خارجي مخصص, بيعملوا فيه دروس للي بيرتاحوا للطبيعة اكتر من الأماكن المقفولة, و كمان عندهم خط انتاج للملابس الرياضية بيبقى معروض فى المكان.



اوسانا فاميلي ويلنس



بتختلف اوسانا عن باقي الأماكن لأنها مش بتركز بس على اليوجا و التأمل, انما بتشتغل على نشر الحياة الصحية و السعادة لكل العيلة. اوسانا بتقدم ورش و دروس فى التغذية, علاج الاروماثيرابي, دروس مختلفة للصحة النفسية و للأمهات, ده غير كورسات للأطفال فى الصيف. المكان كمان بينظم ايڤنتس و بازارات اسبوعية.



ارضي



لو محتاج تهرب فى السريع و تفصل تماماً, ارضي هو المكان المناسب ليك. أرضي مكان جميل و بسيط فى قرية دهشور بيستضيف ريتريتس بشكل مستمر, هدفها ترجعك للطبيعة و تخلّص جسمك و عقلك و روحك من كل السموم عن طريق ورش و برامج منظمة. و احلى حاجة انك مش هنحتاج اجازة طويلة, معظم الرتريتس بتبقى يومين تلاتة بالكتير و فى الويك اند.

مقالات ذات صلة