مشاريع
كارلوس أنيس٢٧ ديسمبر ٢٠١٩
This article is also available in   Switch Language

٥ قهاوي لازم تعدي عليهم في القاهرة

معروف عن القاهرة إنها مدينة الليل والسهر والقهاوى، القاهرة بتاعة القعدة حلوة ولعب الطاولة، القاهرة نداهة، اللي بتنده عليه بتملكه وتوقعه في غرامها، حاجة بتأسرك وتخليك عايز تلف في شورعها وانت مش حاسس غير بالونس، هتتعب من اللف بس مش هتزهق، هتحب تريح على أى قهوة وتشرب كوباية شاى منعنع ولا فنجان قهوة وانت بتسمع صوت الست، عشان كده هنقولك على 5 قهاوى هتحب تقعد عليهم في أماكن هتحب تلف فيها.

١ . قهوة ريش

وانت جى من ميدان التحرير ورايح شارع طلعت حرب، والعمارات القديمة محوطاك من كل نحية، هتلاقي كافيه أسمه ريش، مكتوب عليه تأسس فى 1908م، حاجة كده مفتخرة، أعظم المثقفين والفنانين في تاريخ مصر كانوا بيحبوا يقعدوا عليه، وأسعاره عادية، واللي بيقعدوا عليه بيحبوا الهدوء والعمق، هتبقى قاعد جوه وانت متحاوط بكل روايح الزمن الجميل وقاهرة الملكية والخمسينات، نجيب محفوظ كان بيحب يعمل قعداته فيه، لكن خد بالك من قواعد المكان مفهوش شيشة، من باب المحافظة على وقار القعدة، لازم تجربه.

٢ قهوة زهرة البستان

لو انت بتحب تشيش مش هنسيبك تحتاس برضه، جنب باب ريش هتلاقى ممر، لما تمشى في الممر هتلاقى عالم تاني كله ألوان، هناك هتلاقى الشيشة الحلوة، مش بس كده عارف الجرافيتي المشهور بتاع محمد صلاح هو فى قهوة زهرة البستان، عشان لو حابب تتصور مع جرافيتي فخر العرب، كمان هتبقى حواليك رسومات لكل رموز الفن والأدب في مصر، هتحس أنك قاعد في معرض فني مش فقهوة، مفيش حد راح القهوة ديه وموقعش في حبها، انزل ميدان التحرير واسأل عليها بالاسم.. هتلاقيها.

٣. قهوة التكعيبة

بتحب الرسم والفنانين التشكليين، وبتحب الشيشة المظبوطة، مكانك في التكعيبة في وسط البلد، هتلاقيها في شارع حسين المعمار، اللي بيمز القهوة ديه أن مكانها وسط قاعات الفن والرسم زى تاون هاوس، وكريم فرنسيس، والمشربية، فمتستغريش لو لقيت معظم اللي على القهوة رسامين، متستغريش في النهاية لو لقيت نفسك مرسوم، من واحد قاعد على الترابيزة اللي قدامك.

٤. قهوة الفيشاوى

منطقة الحسين من المناطق اللي بيجيها السكان من كل دول العالم، وعشان هى منطقة مصرية أصيلة، لازم تلاقى عليها قهوة أصيلة، اسمها قهوة الفيشاوى عمرها أكتر من 200 سنة، من 1797م، قعد عليها مثقفين وأدباء ورؤساء دول كمان منهم الرئيس الجزائري عبد العزيز بوتفليقة، ريحة زمان كلها في القهوة ديه والمنطقة ديه، لو رحت الحسين لازم متضيعش الفرصة وتروح تجربها.

٥. قهوة السحيمي

اسأل وانت بتلف في المعز على حارة الضرب الأصفر، هناك هتلاقي قهوة “بيت السحيمي”، جو تاني كله روقان وقاعد في مكان مفتوح والقاهرة الفاطمية نقلاك لعالم تاني، كل اللي انت عايزه هتلاقيه هناك، وأسعاره مش وحشة، وعملين كمان تخت شرقي بيجي يعزف للي قعدين في المكان، وفي ركن للقعدة العربي، لو حابب تريح من قعدة الكراسي وتقعد براحتك انت وصحابك.

مقالات ذات صلة