مشاريع
أفضل اماكن فى مصر لاكتشاف قدراتك الٳبداعية
اياً كان مكانك او وضعك حالياً, هيجي وقت عليك و لازم هتدور على التغيير. لما الوقت ده يجي, احسن حاجة ممكن تعملها انك تعيد اكتشاف نفسك و قدراتك. ارجع لطفولتك و افتكر ايه اكتر حاجة كانت بتشدك, دور جواك على موهبة ممكن تكون مطلعتش لسة. و لحسن الحظ فى اماكن كتير فى مصر هتسعدك…
بالرغم ان كالتوجراف ابتدى من سنة, الا انه نجح فى الوقت البسيط ده انه يبقى ملاذاً لهواة الموسيقى واللي عايزين يتعلموا العزف على الالات المختلفة. كالتوجراف كمان بيقدم كورسات للكتابة المتخصصة اللي مش موجودة فى اماكن تانية كتير, زي كتابة المقترحات للحصول على المنح الفنية, الكتابة عن الفنون المرئية, كتابة الرسائل الاخبارية, و كتابة السير الذاتية.
الف هو المكان الأمثل للي حابب يتعلم حرفة يقدر يشتغل بيها من البيت و يعمل منها شوية فلوس كمان. الف للفن و التعليم بيقدم ورش كتير فى حرف مختلفة, منها ورش تصميم الموزاييك,ورش الكروشيه بجميع اشكاله, ورش الحرف الجلدية, من شنط, محافظ, اكسسوار و غيرهم.
صناعة الافلام للأطفال, اساسيات الكوميكس, كتابة الشعر والأغانى بمساعدة مشاهير زي هانى عادل و امير عيد, هي امثال قليلة للي بيقدمه مكان الفنون. بالأضافة لورش الرسم و النحت و الموسيقى و غيره. مكان الفنون هو الملجأ لكل اللي حابب ينمي موهبته او يتعرف عليها من الاساس.
كيميت هو اسم من اسماء مصرعند قدماء المصريين, و معناه البلد السوداء , دلالة على قوتها و مكانتها قديماً. و حالياً مؤسسة كيميت بتحاول تعيد مكانة مصر فى الفن و التصميم عن طريق تقديم كورسات تعليمية مكثفة فى المجالات المختلفة, زي تصميم الازياء, الخياطة والبترون, تصميم و صناعة الاكسسوارات, بالأضافة لكورسات تصميم الجرافيك.
نيزك من الاماكن القليلة فى مصر اللي بتتخصص فى دراسة الرسزم المتحركة و الجرافيكس. المكان فيه كل الكورسات المتعلقة بالمجال, من قواعد تصميم الجرافيك, لتصميم الرسوم و المخلوقات ثلاثية الأبعاد. مدرسة نيزك كمان بتقدم ديبلومات شاملة مش كورسات بس.
المكان ده جنة لهواة صتاعة الفيلم و السينما. سواء حابب تشتغل فى المجال او نفسك تكتشف موهبتك, ستوديو ذات هو المكان المناسب. الاستديو بيقدم ورش فى صناعة الفيلم,التمثيل, الكتابة, المونتاچ, بالٳضافة لورش تانية بتغطى كل جوانب الصناعة.